Qazaqstan men Germanııa ónerkásiptik kooperatsııany kúsheıtpek

27 tamyzda Berlınde eki eldiń isker toptary arasyndaǵy tikeleı dıalogty damytý jáne birlesken ınvestıtsııalyq ári ónerkásiptik jobalardy ilgeriletýge arnalǵan negizgi alańdardyń biri — Qazaqstan-Germanııa strategııalyq yntymaqtastyq jónindegi iskerlik keńesiniń (QGІK) 17-otyrysy ótti.

Otyrysqa Qazaqstannyń salalyq mınıstrlikteriniń, ulttyq kompanııalarynyń jáne otandyq bıznes-qoǵamdastyqtyń ókilderi qatysty. German tarapynan Siemens Energy, CLAAS KGaA, WILO, KNAUF, HMS Bergbau, Koch Solutions, Aurubis AG, Deutsche Bahn, KfW Bankengruppe, Deutsche Bank jáne basqa da jetekshi ónerkásiptik kásiporyndardyń, tehnologııalyq jáne qarjy ınstıtýttarynyń basshylary men ókilderi qatysty.

Óz sózinde Qazaqstan Respýblıkasy Syrtqy ister mınıstriniń orynbasary Álibek Qýantyrov QGІK-tiń ekonomıkalyq ózara is-qımyldy tereńdetý, iskerlik baılanystardy keńeıtý jáne jańa ınvestıtsııalyq bastamalardy qalyptastyrýdyń tıimdi tetigi retindegi strategııalyq mańyzyn atap ótti. Ol german bıznesiniń Qazaqstan naryǵyna turaqty qyzyǵýshylyǵyn atap ótip, iskerlik baılanystar ornatýdan uzaq merzimdi áriptestikke baǵyttalǵan naqty birlesken jobalardy iske asyrýǵa kóshýdiń qajettigin aıtty.

Óz kezeginde QGІK teń tóraǵasy, German ekonomıkasynyń Shyǵys komıtetiniń atqarýshy dırektory Mıhael Harms eki el arasyndaǵy ekonomıkalyq qatynastardy odan ári damytý úshin joǵary áleýet bar ekenin atap ótti. Onyń aıtýynsha, Qazaqstan Ortalyq Azııadaǵy german bıznesiniń strategııasynda barǵan saıyn mańyzdy oryn alyp keledi.

M. Harms germandyq kompanııalardyń Qazaqstandaǵy qatysýyn keńeıtýge jáne ónerkásip, energetıka, kólik jáne logıstıka, mashına jasaý, shıkizat pen synı materıaldardy óńdeý, sondaı-aq zamanaýı tehnologııalardy engizý salalarynda birlesken jobalardy iske asyrýǵa múddeli ekenin atap ótti. Qazirgi ýaqytta Qazaqstan naryǵynda german kapıtalynyń qatysýymen 1 100-den astam kompanııa jumys isteıdi.

Otyrys barysynda yntymaqtastyqtyń perspektıvalyq baǵyttary boıynsha pikir almasyp, jańa ınvestıtsııalyq jobalardy iske asyrý, óndiristi oqshaýlaý, tehnologııalar transferi, ónerkásiptik kooperatsııany damytý, energetıka, «jasyl» tehnologııalar, synı shıkizat materıaldary, mashına jasaý jáne kólik ınfraqurylymy máseleleri talqylandy.

German bıznesine Qazaqstandaǵy ınvestıtsııalyq jobalardy qoldaýǵa baǵyttalǵan «Báıterek» UBH» AQ-nyń qarjylyq múmkindikteri men quraldary tanystyryldy. Qarjylandyrý tetikterine, memlekettik qoldaý sharalaryna, uzaq merzimdi qarjylandyrýdy tartý múmkindikterine jáne german ınvestorlarynyń qatysýymen birlesken jobalardy iske asyrýǵa erekshe nazar aýdaryldy.

Taraptar kólik-logıstıkalyq yntymaqtastyqty, atap aıtqanda, Transkaspıı halyqaralyq kólik marshrýtyn (THKM), nemese Orta dálizdi damytý máselesine de erekshe nazar aýdardy. Sonymen qatar germandyq tarapqa Alatau City-diń ınvestıtsııalyq áleýeti tanystyryldy.

Sapar aıasynda Á. Qýantyrov Germanııanyń memlekettik organdary men isker toptarynyń ókilderimen birqatar ekijaqty kezdesýler ótkizdi. Atap aıtqanda, GFR Syrtqy ister mınıstrliginiń Eýropa isteri jónindegi Memlekettik mınıstri Gıýnter Krıhbaýmmen, Federaldyq kantsler vedomstvosynyń halyqaralyq ekonomıkalyq saıasat jónindegi ókili Benjamen fon Engelhardtpen, Germanııa Saýda-ónerkásip palatasynyń Basqarma múshesi Folker Traıermen, Germanııa ónerkásibi federaldyq odaǵynyń Basqarma múshesi Volfgang Nıder markpen, sondaı-aq German ekonomıkasynyń Shyǵys komıtetiniń atqarýshy dırektory Mıhael Harmspen kelissózder ótti. Taraptar vedomstvoaralyq ózara is-qımyl tetikterin, birlesken bastamalardy ınstıtýtsıonaldyq qoldaýdy jáne ekijaqty dıalogty nyǵaıtýdyń odan arǵy qadamdaryn talqylady.

Sapar qorytyndysy boıynsha taraptar Qazaqstan-Germanııa iskerlik áriptestigin odan ári nyǵaıtýǵa, eki el bıznes ókilderi arasyndaǵy tikeleı baılanystardy keńeıtýge jáne naqty ınvestıtsııalyq ári tehnologııalyq jobalardy ilgeriletýge ózara múddeliligin rastady.