Qazaqstan men Germanııa ónerkásip, tehnologııa jáne shıkizat salasyndaǵy yntymaqtastyqty damytý jol kartasyna qol qoıdy
ASTANA. KAZINFORM - Qazaqstan men Germanııa 2026–2028 jyldarǵa arnalǵan Ónerkásip, tehnologııa jáne shıkizat salasyndaǵy yntymaqtastyqty damytý jónindegi jol kartasyna qol qoıdy. Kelisim Qazaqstan-Germanııa bıznes-forýmy aıasyndaǵy kelissózder qorytyndysy boıynsha jasaldy, dep habarlaıdy QR Ónerkásip jáne qurylys mınıstrliginiń baspasóz qyzmeti.
Memleket basshysy Qasym-Jomart Toqaevtyń Germanııa Federatıvtik Respýblıkasyna resmı sapary aıasynda Berlın qalasynda eki eldiń isker toptarynyń qatysýymen Qazaqstan-Germanııa bıznes-forýmy ótti.
Forýmnyń paneldik sessııasynyń ashylýy barysynda QR Ónerkásip jáne qurylys mınıstri Ersaıyn Naǵaspaev ekijaqty ózara is-qımyldyń, onyń ishinde ónerkásiptik jáne ınvestıtsııalyq yntymaqtastyqtyń negizgi baǵyttaryna toqtaldy.
2005 jyldan beri Germanııanyń Qazaqstan ekonomıkasyna salǵan tikeleı ınvestıtsııalarynyń kólemi $8 mlrd-tan asty, onyń shamamen 90%-y óńdeý ónerkásibi sektoryna baǵyttalǵan. Qazaqstanda nemis kapıtalynyń qatysýymen 1100-den astam kásiporyn jumys isteıdi. Birlesken ınvestıtsııalyq portfelge jalpy quny $54,2 mlrd bolatyn 44 ınvestıtsııalyq joba kiredi. Olardyń qatarynda CLAAS, Linde, Siemens, Heidelberg Materials, Knauf jáne basqa da kompanııalardyń óndiristeri bar.
-Qazaqstan nemis bıznesimen tyǵyz ári senimdi seriktestik ornatýǵa ashyq. Ozyq tehnologııalarymyzdy, ınvestıtsııalarymyz ben resýrstarymyzdy biriktire otyryp, elderimizdiń ekonomıkalarynyń ıgiligi úshin senimdi ári ornyqty ónerkásiptik kooperatsııa qura alamyz. Ortaq saıası erik-jiger men syndarly dıalogtyń arqasynda ekijaqty strategııalyq seriktestikti odan ári naqty mazmunmen baıyta túsetinimizge senimdimin, – dep atap ótti Ersaıyn Naǵaspaev.
Forým alańynda QR Ónerkásip jáne qurylys mınıstri Ersaıyn Naǵaspaev GFR Federaldyq ekonomıka jáne energetıka mınıstri Katerına Raıhemen kezdesti. Taraptar mıneraldyq-shıkizat bazasyn ıgerý, tehnologııalar transferi jáne tereń óńdeýdi damytý sııaqty keń aýqymdy máselelerdi talqylady.
Sondaı-aq mınıstrlik WILO Central Asia kompanııasymen sorǵy júıelerin lokalızatsııalaýdy kózdeıtin ózara túsinistik týraly memorandýmǵa qol qoıdy. Deutsche Bahn AG kompanııasymen birlesip temirjol mashınalaryn jasaý salasyndaǵy yntymaqtastyq týraly kelisimge qol qoıyldy.
Osyǵan deıin Qazaqstan men Germanııa 2 mlrd dollarlyq 30-dan astam qujatqa qol qoıǵany týraly jazdyq.
