Qazaqstan-Germanııa qatynasyna 35 jyl: bolashaqta yqpaldastyq qaı baǵytta órbimek

ASTANA. KAZINFORM – Qazaqstan men Germanııa ónerkásip, energetıka, kólik-logıstıka jáne ozyq tehnologııalar salalaryndaǵy yntymaqtastyqty keńeıtý máselelerin talqylady.

Qazaqstan men Germanııa ónerkásip pen energetıka salasyndaǵy baılanysty kúsheıtedi
Foto: QR Syrtqy ister mınıstrligi

Bul máseleler Astanada ótken eki el arasyndaǵy saıası konsýltatsııalardyń kezekti raýndynda qaraldy, dep habarlaıdy QR Syrtqy ister mınıstrliginiń baspasóz qyzmeti.

Qazaqstan delegatsııasyn Syrtqy ister mınıstriniń orynbasary Arman Isaǵalıev, Germanııa delegatsııasyn Syrtqy ister mınıstrligi Azııa jáne Tynyq muhıty departamenti dırektorynyń orynbasary, elshi Ioahım Bertele basqardy.

Kezdesýde ekijaqty qatynastardyń qazirgi jaı-kúıi men damý múmkindikteri talqylandy. Taraptar Qazaqstan Prezıdenti Qasym-Jomart Toqaevtyń 29-30 qyrkúıekte Germanııaǵa jasaǵan resmı sapary barysynda qol jetkizilgen ýaǵdalastyqtardy júzege asyrýǵa basymdyq berdi.

Arman Isaǵalıev nemis áriptesin Qazaqstanda júrgizilip jatqan saıası reformalarmen tanystyrdy. Sonymen qatar eki el basshylary deńgeıindegi baılanystardyń qarqyndy damyp kele jatqanyn atap ótip, túrli saladaǵy yntymaqtastyqty tereńdetý jáne birlesken jobalardy ilgeriletý jóninde usynystar aıtty.

Óz kezeginde Ioahım Bertele Astana men Berlın arasyndaǵy syndarly dıalogty, onyń ishinde kópjaqty alańdardaǵy ózara is-qımyldy jalǵastyrýdyń mańyzyn atap ótti. Sondaı-aq Germanııanyń Qazaqstanmen ózara tıimdi áriptestikti keńeıtýge daıyn ekenin rastady.

Kelissózderde ónerkásiptik kooperatsııa, asa mańyzdy shıkizat materıaldary, energetıka, kólik jáne logıstıka, tsıfrlandyrý men ozyq tehnologııalar salalaryndaǵy birlesken jumysty damytý máseleleri qaraldy.

Taraptar 2026-2028 jyldarǵa arnalǵan ónerkásiptik, tehnologııalyq jáne shıkizattyq yntymaqtastyqty damytý jónindegi birlesken jol kartasynyń oryndalý barysyn da talqylady.

Budan bólek, mádenıet, bilim jáne ǵylym salalaryndaǵy baılanystardy nyǵaıtý, joǵary oqý oryndarynyń áriptestigin keńeıtý jáne bilikti mamandar daıarlaý máseleleri sóz boldy. Qazaqstandaǵy nemis qaýymdastyǵynyń eki el arasyndaǵy dostyq qatynastardy damytýdaǵy róli atap ótildi.

Kezdesýde «Ortalyq Azııa – Germanııa» formaty, Eýropalyq odaqpen yntymaqtastyq, BUU men EQYU aıasyndaǵy ózara is-qımyl jáne halyqaralyq kún tártibindegi ózekti máseleler boıynsha pikir almasty.

Kelissózder qorytyndysynda taraptar 2027 jyly dıplomatııalyq qatynastardyń ornaǵanyna 35 jyl tolýyna oraı saıası dıalogty jalǵastyryp, ózara tıimdi yntymaqtastyqty odan ári keńeıtýge múddeli ekenin rastady.

Osyǵan deıin Qazaqstan men Germanııa sý salasynda iri jobalardy birlesip júzege asyratyny týraly jazdyq.