Qazaqstan men Germanııa qos dıplomdy baǵdarlamalardy keńeıtedi
ASTANA. KAZINFORM — Prezıdent eki el joǵary oqý oryndarynyń seriktestigi aıasynda Qazaqstan ekonomıkasynyń qajettiligine saı bilim jáne ǵylym ortalyqtary qurylyp jatqanyn aıtty. Bul týraly Aqordanyń baspasóz qyzmeti habarlady.
Atalǵan jumystyń nátıjesinde Mańǵystaý, Shyǵys Qazaqstan oblystarynda jáne Almaty qalasynda Qazaqstan-Germanııa birlesken ýnıversıtetteri ashyldy.
– Bul mysaldar myna mańyzdy qaǵıdanyń durys ekenin kórsetedi. Naqty ekonomıkalyq jáne tehnologııalyq qajettilikke saı keletin akademııalyq seriktestik nátıjeli bolady. Ýnıversıtetter óndiristen alshaqtap ketpeýi kerek. Ǵylymı zertteýler jańa tehnologııalardy oılap tabýǵa túrtki bolýǵa tıis. Al bilim berý júıesi ekonomıkany biliktiligi joǵary mamandarmen qamtamasyz etýi qajet, – dedi Prezıdent.
Qasym-Jomart Toqaev bilim almasý tájirıbesinen bilim qoryn birlese jasaý úderisine kóshýge múmkindik beretin seriktestiktiń úsh negizgi baǵytyn usyndy.
– Birinshiden, birlesken bilim berý baǵdarlamalaryn kóbeıtip, seriktes oqý oryndary arasyndaǵy qos dıplomdy baǵdarlamalardyń aıasyn keńeıtý kerek. Eki el stýdentteri men zertteýshileriniń birlese jumys isteýine múmkindik berý mańyzdy. Osy oraıda elderimizdiń arasyndaǵy akademııalyq baılanysty nyǵaıtýǵa yqpal etetin arnaıy bilim almasý baǵdarlamasyn iske qosýdy usynamyn, – dedi Prezıdent.
Aıta ketelik Memleket basshysy Germanııanyń mańdaıaldy joǵary oqý oryndary rektorlarymen jáne ǵylymı ınstıtýt jetekshilerimen kezdesti.
