Qazaqstan men Germanııa kompanııalary arasynda yntymaqtastyq týraly memorandýmdarǵa qol qoıyldy
ASTANA. KAZINFORM – Atalǵan qujattarǵa Astanada Qazaqstan Respýblıkasy Syrtqy ister mınıstrliginde «Ornyqty damýǵa birlesip qol jetkizý: Qazaqstan Respýblıkasy men Germanııa Federatıvtik Respýblıkasynyń «jasyl» bolashaq jolyndaǵy strategııalyq seriktestigi» taqyrybynda Berlın Eýrazııalyq klýbynyń kezekti otyrysy barysynda qol qoıyldy.
QR Syrtqy ister mınıstrligi baspasóz qyzmetiniń habarlaýynsha, is-shara Óńirlik ekologııalyq sammıt aıasynda eki eldiń memlekettik organdary, isker toptary men halyqaralyq uıymdarynyń qatysýymen uıymdastyryldy.
QR Syrtqy ister mınıstriniń birinshi orynbasary Erjan Ashyqbaev 2012 jyldan beri Berlın Eýrazııalyq klýby dıalogtan naqty birlesken jobalardy iske asyrýǵa múmkindik beretin tıimdi alań retinde ózin tanytqanyn atap ótti.
Onyń aıtýynsha, Qazaqstan men Germanııa arasyndaǵy qatynastar senimge, pragmatızmge jáne uzaq merzimdi múddelerdiń úndestigine negizdelgen strategııalyq seriktestik deńgeıine jetti. Germanııa Eýropa odaǵyndaǵy Qazaqstannyń negizgi seriktesteriniń biri, al Qazaqstan Ortalyq Azııadaǵy óńirlik yntymaqtastyqtyń mańyzdy ortalyǵy.
E.Ashyqbaev klımattyń ózgerýi jaǵdaıynda sý ekonomıkalyq damýǵa, azyq-túlik qaýipsizdigine jáne óńirlik qaýipsizdikke tikeleı áser etetin strategııalyq resýrsqa aınalǵanyn aıtty. Qazaqstan sý qaýipsizdigin memlekettik saıasattyń basym baǵyty retinde qarastyryp, tıisti mınıstrlikti qurý, ınfraqurylymdy jańǵyrtý jáne tsıfrlyq ári sý únemdeý tehnologııalaryn engizýdi qosa alǵanda, júıeli sharalardy júzege asyryp jatyr.
Qazirgi ýaqytta Qazaqstan BUU aıasynda Halyqaralyq sý uıymyn qurý bastamasyn ilgeriletip, halyqaralyq áriptesterdiń qoldaýyna úmit artady. Osy turǵyda onyń ishinde «Ortalyq Azııa – Germanııa» formaty men «Green Central Asia» bastamasy sheńberinde óńirlik yntymaqtastyqty nyǵaıtýdyń mańyzy zor.
Germanııa ekonomıkasynyń Shyǵys komıteti basqarma tóraǵasy Katrına Klaas-Mıýlhoızer Qazaqstannyń reformalardyń serpinin joǵary baǵalap, sý sektoryndaǵy yntymaqtastyqtyń perspektıvalaryn atap ótti. Mysal retinde ınnovatsııalar, tsıfrlandyrý jáne kadr daıarlaý alańy bolatyn Kazakh-German Water Hub qurý bastamasy ataldy.
Otyrys barysynda taraptardyń praktıkalyq yntymaqtastyqty tereńdetý úshin eleýli áleýetke ıe ekeni, sonyń ishinde ınfraqurylymdyq jáne ekologııalyq jobalardy birlesip iske asyrý, ǵylymı-zertteý bastamalaryn damytý jáne óńirlik klımattyq kún tártibin nyǵaıtý múmkindigi aıtyldy.
Eki paneldik sessııa barysynda qatysýshylar azyq-túlik qaýipsizdigi, sý resýrstaryn basqarý, klımattyq ornyqtylyq máselelerin, sondaı-aq óńirlik qaýipsizdik pen ekologııalyq yntymaqtastyqty nyǵaıtý quraly retindegi «Green Central Asia» bastamasyn iske asyrý jaıyn talqylady. Ozyq tehnologııalarmen almasýǵa jáne salaaralyq ózara is-qımyldy damytýǵa erekshe nazar aýdaryldy.
Otyrys qorytyndysy boıynsha Qazaqstan Respýblıkasy Ekologııa jáne tabıǵı resýrstar mınıstrligi men Germanııanyń Qorshaǵan orta máseleleri jónindegi táýelsiz ınstıtýty; Qazaqstan Respýblıkasy Sý resýrstary jáne ırrıgatsııa mınıstrligi men Germanııanyń Qorshaǵan orta máseleleri jónindegi táýelsiz ınstıtýty; Sý resýrstaryn aqparattyq-taldaý ortalyǵy men Germanııanyń Qorshaǵan orta máseleleri jónindegi táýelsiz ınstıtýty; sondaı-aq «Qazaqstandyq turǵyn úı-kommýnaldyq sharýashylyǵyn jańǵyrtý jáne damytý ortalyǵy» AQ, «German Water Partnership» Germanııa sý qaýymdastyǵy jáne «System S&P GmbH» kompanııasy arasynda yntymaqtastyq týraly memorandýmdarǵa qol qoıyldy.
Osyǵan deıin Germanııaǵa qazaqstandyq munaıdy jetkizý kólemi artatyny týraly jazdyq.
