Qazaqstan men Germanııa energetıka salasyndaǵy jańa jobalardy iske asyrýǵa kelisti
ASTANA. KAZINFORM — Erlan Aqkenjenov Germanııanyń Ekonomıka jáne energetıka federaldyq mınıstri Katarına Raıhemen kezdesti, dep habarlaıdy Energetıka mınıstrliginiń baspasóz qyzmeti.
QR Energetıka mınıstri Erlan Aqkenjenov pen Germanııa Federatıvtik Respýblıkasynyń Ekonomıka jáne energetıka federaldyq mınıstri Katarına Raıhe tehnologııalyq áriptestikti keńeıtý jáne energetıkalyq ınfraqurylymǵa ınvestıtsııalar tartý máselelerin talqylady.
Kezdesý «Astana» halyqaralyq qarjy ortalyǵy alańynda ótti.
Kelissózder barysynda taraptar Germanııadaǵy negizgi ónerkásip kásiporyndarynyń óndiristik suranysyn qamtamasyz etý maqsatynda qazaqstandyq munaı jetkizilimin odan ári damytý múmkindikterin jan-jaqty qarastyrdy. Eksporttyq tasymaldardyń logıstıkasy qazirgi makroekonomıkalyq jaǵdaılarǵa sáıkes jedel beıimdelýde: kommertsııalyq mindettemelerdi oryndaý úshin Qazaqstan munaı aǵyndaryn Kaspıı qubyr konsortsıýmy júıesine ıkemdi túrde qaıta baǵyttap, balamaly tranzıttik baǵyttardy belsendi paıdalanyp keledi.
Erlan Aqkenjenov nemis bıznespen birlesip júzege asyrylyp jatqan ındýstrııalyq jobalardy joǵary baǵalady. Búginde eýropalyq ınjenerlik sheshimder elimizdiń energetıka salasyna tabysty engizilýde. Atap aıtqanda, Siemens Energy kontserni Almaty qalasy men Túrkistan oblysynda salynyp jatqan jańa generatsııa nysandaryn zamanaýı gaz týrbınalarymen bekitilgen kestege sáıkes jabdyqtap jatyr.
Turaqty damý baǵytyndaǵy negizgi máselelerdiń biri retinde Mańǵystaý oblysynda Svevind Energy kompanııasy iske asyryp jatqan Hyrasia One jobasy qaraldy. Joba iske qosylǵannan keıin jyl saıyn 2 mıllıon tonnaǵa deıin ekologııalyq taza sýtegi óndirilip, aldaǵy onjyldyqta Eýropalyq odaqtyń ımporttyq suranysynyń shamamen 20 paıyzyn qamtamasyz etýge múmkindik beredi.
— Qazaqstan men Germanııa arasyndaǵy energetıkalyq yntymaqtastyq ózara tıimdi ekonomıkalyq áriptestik qaǵıdattaryna negizdelip damyp keledi. Qazaqstannyń tabıǵı resýrstary men Germanııanyń ozyq tehnologııalaryn ushtastyrý arqyly biz uzaq merzimdi ári senimdi energetıkalyq yntymaqtastyqtyń berik negizin qalyptastyryp jatyrmyz, — dedi QR Energetıka mınıstri Erlan Aqkenjenov.
Kezdesý qorytyndysynda taraptar Qazaqstan ekonomıkasyndaǵy nemis ınvestıtsııalyq jobalaryn tıimdi iske asyrý maqsatynda tehnıkalyq jáne ekonomıkalyq tájirıbe almasýdy jalǵastyrýǵa ýaǵdalasty.
Budan buryn Premer-mınıstr Oljas Bektenov pen Germanııanyń federaldy ekonomıka jáne energetıka mınıstri Katerına Raıhe ekonomıkalyq yntymaqtastyq máselelerin talqylaǵanyn jazdyq.
