Qazaqstan men Germanııa bıznes-qaýymdastyǵy arasynda tájirıbe almasýdy kózdeıtin qujat merzimi uzartyldy
ASTANA. KAZINFORM - Astanada kooperatsııalyq jobalardy iske asyrý qorytyndysyna arnalǵan Keńeıtilgen konferentsııa sheńberinde «Partneringin business with Germany» baǵdarlamasyn 2026-2028 jyldarǵa uzartý týraly birlesken kelisimge qol qoıyldy.
Bul oqıǵa shaǵyn jáne orta kásipkerlikti qoldaý, áriptestik baılanysty keńeıtý, Qazaqstan men Germanııanyń bıznes-qaýymdastyǵy arasynda tájirıbe almasýda ekijaqty yntymaqtastyqty damytýdyń mańyzdy kezeńi.
«Partnering in Business with Germany» baǵdarlamasy Qazaqstan Respýblıkasynyń Ulttyq ekonomıka mınıstrligi men Germanııanyń Federaldyq ekonomıka jáne Energetıka mınıstrligi arasyndaǵy birlesken málimdeme negizinde on bes jyldan beri iske asyrylyp keledi. Osy ýaqyt ishinde 800-den astam qazaqstandyq kásipker Germanııada taǵylymdamadan ótip, bıznes júrgizýdiń zamanaýı ádisterin ıgerdi. Óndiristi jańǵyrtyp, kelisimsharttar jasasty. Lıtsenzııalar men franchaızıngter satyp aldy.
Bıyl da qazaqstandyq qatysýshylar baǵdarlamanyń múmkindigin belsendi paıdalanýdy jalǵastyrýda. Oqý GISMA bıznes damytý ortalyqtarynda (Berlın, Potsdam) Gannover kórmesine, COGNOS (Gambýrg) aımaqtyq kórmelerge, EABW (Tıýbıngen) densaýlyq saqtaý salasyna jáne mamandandyrylǵan medıtsınalyq kórmelerge, sondaı-aq CDC (Keln) ANUGA eń iri azyq-túlik kórmesine qatysýmen qatar júrgizildi. Oqytýdy, saqtandyrýdy, turýdy, jalpy barlyq shyǵyndy qabyldaýshy tarap óteıdi.
Konferentsııa barysynda baǵdarlama qorytyndysyna jáne aldaǵy kezeńdegi jańa mindetterge erekshe nazar aýdaryldy.
QR Ulttyq ekonomıka vıtse-mınıstri Erlan Saǵnaev quttyqtaý sóz sóılep, yntymaqtastyqty uzartýdyń mańyzdylyǵyn atap ótti. Baǵdarlama kásipkerlerdiń kásibı ósýine ǵana emes, eki el arasyndaǵy ekonomıkalyq baılanysty nyǵaıtýǵa da yqpal etpek.
Іs-sharaǵa Germanııanyń Qazaqstandaǵy elshisiniń turaqty orynbasary Ýlrıh Kınne, ekonomıka jáne energetıka federaldyq mınıstrliginiń V departamentiniń basshysy Ralf Beme, «Atameken» UKP, halyqaralyq yntymaqtastyq jónindegi nemis qoǵamynyń (GIZ) ókilderi, sondaı-aq baǵdarlama túlekteri qatysty.
Eske salsaq, 2025 jylǵy 31 jeltoqsanǵa deıin uzartý týraly aldyńǵy memorandýmǵa 2023 jylǵy 20 maýsymda qol qoıylǵan bolatyn. Jańa kelisim baǵdarlamanyń jumysyn 2028 jyldyń sońyna deıin jalǵastyrýdy kózdeıdi. Bul tájirıbe almasyp, birlesken bastamalardy iske asyrý úshin qosymsha múmkindik beredi.
Osyǵan deıin Qazaqstan men Germanııa ýnıversıtetteriniń Konsortsıýmy qurylatyny týraly jazdyq.