Qazaqstan men Germanııa arasyndaǵy taýar aınalymy 5,2 mlrd eýrodan asty
NUR-SULTAN. QazAqparat - 2018 jyldyń qorytyndysynda Qazaqstan men Germanııa arasyndaǵy taýar aınalymy 5,2 mlrd eýrodan asty. Bul jaıynda búgin Qazaqstannyń Germanııadaǵy Tótenshe jáne Ókiletti Elshisi Bolat Núsipov aıtty, dep habarlaıdy QazAqparat tilshisi.
«Qazirgi ýaqytta Germanııanyń saýda seriktesteri reıtınginde Qazaqstan 51-orynda tur. Germanııanyń Ortalyq Azııanyń barlyq 5 elimimen syrtqy saýdasynyń 85 paıyzdan astamy Qazaqstanǵa tıesili», - dedi Bolat Núsipov elordada ótken Berlın eýrazııalyq klýbynyń 26-otyrysynda.
Onyń málimetinshe, nemis ınvestıtsııasynyń shamamen 90 paıyzy Qazaqstannyń shıkizat emes sektoryna, ıaǵnı, shynaıy sektordaǵy qaıta óńdeý ónerkásibine salynǵan.
«Ótken jyldyń qorytyndysynda eki eldiń arasyndaǵy taýar aınalymy 5,2 mlrd eýro sheginen asyp tústi. Menińshe, bul - óte jaqsy kórsetkish. Sońǵy 12 jylda Germanııadan Qazaqstanǵa kelgen tikeleı ınvestıtsııanyń kólemi 8,6 mlrd AQSh dollary boldy. Biz ınvestıtsııa salasyndaǵy yntymaqtastyǵymyzdyń áleýetin munan ary da barynsha paıdalanbaqpyz. Ol úshin bizde qajetti barlyq tetikter bar», - dedi Qazaqstan Elshisi.
Aıta keteıik, Berlın eýrazııalyq klýby 2012 jyly QR Tuńǵysh Prezıdenti - Elbasy N.Nazarbaev pen Germanııanyń burynǵy vıtse-kantsleri, Syrtqy ister mınıstri H-D.Gensherdiń bastamasymen qurylǵan bolatyn. Osy ýaqytqa deıin klýb otyrystary kezek-kezegimen elorda, Brıýssel jáne Berlın qalalarynda ótken.
