Qazaqstan men Germanııa agrarlyq salalarda yntymaqtaspaq
BERLIN. QazAqparat - Berlınde «Aýyl sharýashylyǵy jáne agroónerkásip kesheni ilgerileýde - nemis bıznesi úshin múmkindikter» dóńgelek ústeli ótti. Shara «Jasyl apta - 2018» halyqaralyq aýyl sharýashylyǵy kórmesi aıasynda uıymdastyryldy, dep habarlaıdy «QazAqparat» HAA menshikti tilshisi.
Іs-shara GFR-daǵy QR Elshiliginiń jáne Qazaqstan-Germanııa agrarlyq-saıası dıalogynyń uıymdastyrýshylyq qoldaýymen Germanııa kompanııalary men aýylsharýashylyq birlestikteri ókilderiniń qatysýymen ótken. 
Germanııadaǵy Qazaqstan elshisi Bolat Núsipov nemis seriktesterine Memleket basshysynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýyndaǵy QR Agroónerkásip keshenin damytý bólimindegi negizgi maqsattar men mindettermen tanystyrdy.
«Germanııanyń agrarlyq-saıası dıalog arqyly aýyl sharýashylyǵy áleýetin qoldaný men Qazaqstannyń agroónerkásip salasyn turaqty damytý úderisindegi bilimi jáne tájirıbesimen Qazaqstanǵa belsendi qoldaý kórsetip otyrǵanyn atap ótkim keledi», - dedi qazaqstandyq dıplomat.
Óz kezeginde, S.Seıfýllın atyndaǵy agrotehnıkalyq ýnıversıtettiń rektory Aqylbek Kúrishbaev Dúnıejúzilik azyq-túlik uıymynyń «Qazaqstandy azyq-túlikpen álemdi qamtamasyz etý áleýeti bar úzdik bes eldiń ishine qosqanyn» atap ótti.
«Qazaqstan-Germanııa agrarlyq-saıası dıalogy» jobasynyń jetekshisi Dıthard Rýdert QR men GFR arasyndaǵy yntymaqtastyqtyń berik ekendigin tilge tıek etip, onyń negizgi baǵyttary týraly aıtty.
Onyń aıtýynsha, Qazaqstan-Germanııa agrarlyq-saıası dıalogynyń basty mindeti QR men GFR joǵary oqý oryndary arasyndaǵy ǵylymı yntymaqtastyqty qamtamasyz etý jáne zańnama jasap shyǵarýǵa kómektesý bolyp tabylady.
Jalpy alǵanda, dóńgelek ústeldiń qatysýshylary Qazaqstannyń ınvestıtsııalyq tartymdylyǵyn atap ótip, aýyl sharýashylyǵy, agroónerkásiptik mashına jasaý salalaryndaǵy birlesken jobalardy júzege asyrýǵa qyzyǵýshylyq tanytty.
Aıta keteıik, «Jasyl apta 2018» halyqaralyq aýyl sharýashylyǵy kórmesi aıasynda Berlınde 67 eldiń 1600 jádigeri tanystyryldy.
