Qazaqstan men Germanııa 2 mlrd dollarlyq 30-dan astam qujatqa qol qoıdy
ASTANA. KAZINFORM — Memleket basshysy sapardy qorytyndylaı kelip, Germanııa Federaldyq Kantslerimen mazmundy kelissózder aıasynda taraptar mańyzdy kelisimderge qol jetkizgenine nazar aýdardy. Bul týraly Aqordanyń baspasóz qyzmeti habarlady.
Prezıdenttiń aıtýynsha, búgingi kezdesýler mazmundy jáne tabysty ótti deýge tolyq negiz bar.
– Kelissózder aıasynda jalpy quny shamamen 2 mıllıard dollar bolatyn 30-dan astam kommertsııalyq qujatqa qol qoıyldy. Kelisimsharttar tıimdi júzege asyrylsa, eki eldiń yntymaqtastyǵy bekemdele túsetini anyq. Men erteń Bavarııa qalasyna baryp, birqatar joǵary laýazymdy tulǵalarmen kezdesýdi josparlap otyrmyn. Sapar barysynda biregeı jıyn – Qazaqstan-Bavarııa tehnologııalyq forýmyna qatysamyn. Bul basqosý da elderimizdiń yntymaǵyn nyǵaıtýǵa septigin tıgizedi dep senemin, – dedi Qasym-Jomart Toqaev.
Qazaqstan Prezıdenti men Germanııa Federaldyq Kantsleri aımaqtyq jáne jahandyq deńgeıdegi ózekti máseleler jóninde pikir almasqan.
– Biz kez kelgen shıelenisti beıbit jáne dıplomatııalyq jolmen sheshý qajet dep esepteımiz. Bul – eki elge de ortaq ustanym. Sonymen qatar biz «Ortalyq Azııa – Germanııa» formatyndaǵy dıalogti odan ári damytýǵa kelistik. Qazaqstan Germanııamen uzaqmerzimdi, ózara tıimdi jáne naqty nátıjege negizdelgen strategııalyq seriktestikti kúsheıte túsýge nıetti, – dedi Memleket basshysy.
Aıta ketelik Qasym-Jomart Toqaev Germanııaǵa resmı saparmen bardy. Sonymen qatar Qasym-Jomart Toqaev pen Frank-Valter Shtaınmaıer Birlesken deklaratsııa qabyldady. Sondaı-aq Prezıdent Qasym-Jomart Toqaev Kantsler Frıdrıh Mertspen kelissóz júrgizdi.
