Qazaqstan men Frantsııa prezıdentteri shaǵyn quramda kelissóz júrgizdi
Memleket basshysy Qasym-Jomart Toqaev Aqordada Qazaqstanǵa resmı saparmen kelgen Frantsııa Prezıdenti Emmanıýel Makronmen kelissóz júrgizdi, dep habarlaıdy Kazinform.
Kelissóz aldynda Qasym-Jomart Toqaev pen Emmanıýel Makron bir-birine resmı delegatsııa múshelerin tanystyrdy. Qurmet qaraýylynyń bastyǵy memleketter basshylaryna raport berip, eki eldiń ánurandary shyrqaldy. Sodan keıin prezıdentter shaǵyn quramda kelissóz júrgizý úshin Shyǵys zalyna bardy.
Qasym-Jomart Toqaev Emmanıýel Makronǵa iltıpat bildirip, jyly qarsy aldy.
– Prezıdent myrza, biz úshin búgin úlken oqıǵa. Sizdiń saparyńyzdy bárimiz quptaımyz. Meniń shaqyrýymdy qabyl alyp, Qazaqstanǵa resmı saparmen kelgenińiz úshin alǵys aıtamyn. Qazaqstan men Frantsııa arasyndaǵy yntymaqtastyq jaqsy damyp kele jatyr. Degenmen ekijaqty qarym-qatynasqa tyń serpin berý kerek. Sondyqtan sizdiń saparyńyzdy tarıhı, óte mańyzdy dep aıtýǵa bolady. Búgingi kelissózder nátıjeli bolatynyna senimdimin. Oǵan eshqandaı kúmánim joq, – dedi Prezıdent.
Memleket basshysy Frantsııa Qazaqstannyń Eýropa Odaǵyndaǵy basty jáne senimdi seriktesi, sondaı-aq el ekonomıkasynyń iri ınvestorynyń biri ekenin atap ótti.
Óz kezeginde Emmanıýel Makron Qazaqstan men Frantsııa arasyndaǵy baılanystarǵa joǵary baǵa berdi.
Aıta ketsek, Frantsııa Prezıdenti Emmanıýel Makron resmı saparmen Qazaqstanǵa keldi.
Qasym-Jomart Toqaev Aqordada Frantsııa Prezıdenti Emmanıýel Makrondy qarsy aldy.
Memleket basshylarynyń kezdesýinen keıingi qos eldiń qarym-qatynasy qaı baǵytta damýy múmkin?
