Qazaqstan men Frantsııa ónerkásip salasynda yntymaqtastyqty keńeıtedi
ASTANA. KAZINFORM — Qazaqstan geologııalyq barlaý, óndirý jáne syndarly mıneraldardy qaıta óńdeý salalarynda frantsýz jáne eýropalyq kompanııalarmen yntymaqtastyqty keńeıtýge múddeliligin rastady. Bul týraly Ónerkásip jáne qurylys mınıstrliginiń baspasóz qyzmeti habarlady.
Parıjge jasaǵan jumys sapary aıasynda Qazaqstan Respýblıkasy Ónerkásip jáne qurylys mınıstri Ersaıyn Naǵaspaev ekonomıkanyń mańyzdy salalarynda yntymaqtastyqty keńeıtýge jáne ınvestıtsııa tartýǵa baǵyttalǵan birqatar kezdesýler ótkizdi.
Mınıstr Qazaqstan-Frantsýz iskerlik keńesiniń 14-shi otyrysyna qatysyp, frantsýz bıznesi úshin Qazaqstandaǵy jańa múmkindikterdi tanystyrdy. Talqylaýǵa memlekettik organdardyń, kvazımemlekettik sektordyń ókilderi, sondaı-aq Airbus, TotalEnergies, Thales, Alstom, Veolia Environnement, Suez SA jáne basqa da Frantsııanyń jetekshi kompanııalarynyń basshylary qatysty.
Taraptar ónerkásiptik kooperatsııany damytý, birlesken jobalardy iske asyrý jáne óndiristerdi Qazaqstanda jergilikti etý perspektıvalaryn talqylady. Kezdesý qatysýshylary atap ótkendeı, elimiz ınvestorlarǵa uzaq merzimdi ári joǵary tehnologııalyq bastamalardy júzege asyrý úshin qajetti jaǵdaılardy usynýǵa daıyn.
Ersaıyn Naǵaspaev sondaı-aq Frantsııanyń Syrtqy saýda jáne tartymdylyq jónindegi mınıstr-delegaty Nıkolıa Forısemen birlesip Qazaqstannyń syndarly mıneraldary men metaldary boıynsha dóńgelek ústeldiń ashylýyna qatysty.
Óz sózinde mınıstr eldiń mıneraldyq-shıkizat bazasynyń áleýeti, geologııa salasyn damytý josparlary jáne sırek kezdesetin ári strategııalyq mańyzdy metaldardyń turaqty jetkizilimin qamtamasyz etý sharalary týraly aıtty.
Qazaqstan geologııalyq barlaý, óndirý jáne syndarly mıneraldardy qaıta óńdeý salalarynda frantsýz jáne eýropalyq kompanııalarmen yntymaqtastyqty keńeıtýge múddeliligin rastady.
Parıjdegi jumys sapary ónerkásiptik jáne ınvestıtsııalyq baılanystardy nyǵaıtýdaǵy mańyzdy qadam bolyp, Qazaqstan men Frantsııanyń aýqymdy ári ınnovatsııalyq jobalardy birlesip júzege asyrýǵa degen ortaq umtylysyn kórsetti.
Aıta ketelik Qazaqstan men Frantsııa ushaq jetkizý týraly kelisim jasasqan edi.