Qazaqstan men Frantsııa birlesip, bilim berý, jastardyń ózara tájirıbe almasýyna múmkindik jasamaq
ASTANA. KAZINFORM - QR Premer-mınıstriniń orynbasary – Mádenıet jáne aqparat mınıstri Aıda Balaeva Kreatıvti ındýstrııalardy damytý qorynyń keńsesinde «La France s’engage» qorynyń prezıdenti Odrı Azýlemen kezdesýi ótti.
QR Mádenıet jáne aqparat mınıstrligi baspasóz qyzmetiniń habralaýynsha, kezdesý barysynda taraptar «La France s’engage» qorymen birlesken bastamalardy damytý máselelerin talqylady. Qordyń negizgi mıssııasy – Frantsııadaǵy áleýmettik jáne ekologııalyq ınnovatsııalardy qoldaý ári ilgeriletý. Atap aıtqanda, qor bilim berý, jumyspen qamtý, densaýlyq saqtaý, ekologııa, áleýmettik beıimdeý jáne tsıfrlyq múmkindikterdiń teń qoljetimdiligi salalaryndaǵy qoǵamdyq mańyzy bar máselelerge tyń sheshim usynatyn jobalarǵa qoldaý kórsetedi.
Áńgime barysynda bilim berý, ekologııa jáne tsıfrlyq teń qoljetimdilik baǵyttarynda yntymaqtastyq ornatý jónindegi bastamalar qaraldy. Sonymen qatar birlesken bilim berý baǵdarlamalaryn iske asyrý jáne jastardyń ózara tájirıbe almasýyna múmkindik jasaý seriktestiktiń perspektıvaly baǵyttarynyń biri retinde ataldy.
Kezdesý qorytyndysy boıynsha taraptar ózara áriptestikti odan ári nyǵaıtýǵa jáne birlesken jobalardy júzege asyrýǵa múddeli ekenin rastady.
Osyǵan deıin Aıda Balaeva kreatıvti ındýstrııa Qazaqstannyń jańa ekonomıkalyq saıasatynyń mańyzdy baǵytyna aınalyp kele jatqany týraly aıtqan bolatyn.
