Qazaqstan men Frantsııa Balqash kólin saqtaý boıynsha yntymaqtastyq týraly kelisimge qol qoıdy
ASTANA. KAZINFORM – Qazaqstan men Frantsııa One Water Summit aıasynda Balqash kólin saqtaý boıynsha yntymaqtastyq týraly kelisimge qol qoıdy. Bul týraly Sý resýrstary jáne ırrıgatsııa mınıstrligi málimdedi.
Mınıstrlik pen Frantsııa damý agenttigi (AFD) jáne Frantsııanyń geologııalyq jáne taý-ken bıýrosy (BRGM) yntymaqtastyq týraly úshjaqty kelisimge qol qoıdy.
Qazaqstan Prezıdenti Qasym-Jomart Toqaev pen Frantsııa Prezıdenti Emmanıýel Makronnyń qatysýymen Saýd Arabııasynda ótip jatqan One Water Summit halyqaralyq sammıtinde ýaǵdalastyqqa qol jetkizildi.
QR Sý resýrstary jáne ırrıgatsııa mınıstrligi tarapynan kelisimge qol qoıý rásimine birinshi vıtse-mınıstr Bolat Beknııaz qatysty.
Qujattyń negizgi maqsaty – Balqash kólin saqtaý baǵytynda yntymaqtastyqty damytý. Kelisim Sý resýrstary jáne ırrıgatsııa mınıstrligine Balqash kóliniń sý resýrstaryn basqarýdy damytýǵa 1,35 mln eýro kóleminde grant bólýdi kózdeıdi.
Frantsýz tarapy Balqash kóli basseınine aýqymdy zertteý júrgizedi, onyń nátıjesi boıynsha 2040 jylǵa deıin uzaq merzimdi bas jospar ázirlenedi.
Qujatta sý aıdynynyń ishki sýlaryn saqtaý is-sharalary jazylady. Sonymen qatar, mınıstrlik BRGM-men sý resýrstary týraly ózara túsinistik týraly Memorandýmǵa qol qoıdy. Qujat osy saladaǵy ekijaqty yntymaqtastyqty damytýdy kózdeıdi.
«AFD jáne BRGM-men úshjaqty kelisim Balqash kóli basseınindegi sýdy turaqty basqarýǵa jáne zertteýge baǵyttalǵan. Qujat sýdyń jaı-kúıin ólsheý men taldaý, klımattyq jáne antropogendik áserlerdi modeldeý, sondaı-aq 2040 jylǵa deıin sý balansyn boljaýdy qarastyrady. Jobanyń maqsattarynyń biri – Balqash kóliniń deńgeıin turaqtandyrý úshin Qapshaǵaı sý qoımasynyń jumys tártibin ońtaılandyrý. Zertteý nátıjesi boıynsha ózenderdi tazartý, topyraqtyń tozýyn jáne sýdyń lastanýyn boldyrmaý, balyq sharýashylyǵy men ekologııalyq týrızmdi damytý, sondaı-aq kóldi qorǵaý úshin normatıvtik-quqyqtyq baza qurý jónindegi is-sharalar júrgiziletin bolady, - dedi Sý resýrstary jáne ırrıgatsııa mınıstri Nurjan Nurjigitov.
Qasym-Jomart Toqaev Saýd Arabııasynyń astanasynda ótip jatqan One Water sammıtiniń ashylý saltanatynda sóz sóılegen bolatyn.