Qazaqstan men Frantsııa Balqash kóli basseınine aýqymdy zertteý júrgizý múmkindigin qarastyryp jatyr
ASTANA. KAZINFORM - Sý resýrstary jáne ırrıgatsııa birinshi vıtse-mınıstri Bolat Beknııaz frantsııalyq delegatsııamen kezdesip, Balqash kólin birlesip zertteý men jerasty sýlaryn basqarý salasyndaǵy yntymaqtastyq múmkindikterin talqylady, dep habarlaıdy mınıstrliktiń baspasóz qyzmeti.
Eń aldymen Frantsııanyń geologııalyq jáne taý-ken zertteýleri Bıýrosynyń (BRGM) sarapshylary men qazaqstandyq mamandar arasyndaǵy yntymaqtastyq týraly sóz boldy. Joba ótken jyly iske qosyldy jáne búgingi kúnge deıin frantsýz sarapshylarynyń qatysýymen Qazaqstanda jerasty sý resýrstaryn basqarýdaǵy eń ózekti máselelerdi anyqtaý maqsatynda 8 semınar ótti.
Bolat Beknııaz mınıstrlik kún tártibindegi barlyq máselelerdi muqııat zerdelep, basym baǵyttardy anyqtaıtynyn aıtty. Osydan keıin frantsýz sarapshylary olardy sheshý ádisterin aıqyndaıtyn tujyrymdamalyq qujat jasaıdy.
Sondaı-aq, Frantsııadan kelgen qonaqtar Balqash kóli basseınine aýqymdy zertteý júrgizý jáne onyń sý resýrstaryn basqarý modelin jasaý týraly bastama kóterdi. Bul jumys jerseriktik sýretterdi zertteýdi jáne gıdrogeologııalyq taldaýdy qamtıdy. Joba iske asyrylǵan jaǵdaıda zertteýlerge Frantsýz damý agenttigin tartý josparlanyp otyr.
«Usynys óte qyzyq. Ózderińiz biletindeı, Aral men Kaspııdi zertteý jáne saqtaý máselelerimen aınalysatyn uıymdar bar. Biraq, kól basseınin aýqymdy zertteý qajet bolǵanymen, Balqash boıynsha jekelegen ınstıtýttar nemese qorlar joq. Biz osy baǵytta birlesip jumys isteýge daıynbyz. Sondaı-aq, osy múmkindikti paıdalana otyryp, frantsýz delegatsııasyn mamyr aıynyń sońynda ótetin «Balqash-2024» Halyqaralyq sý–klımattyq forýmyna shaqyramyn», - dedi Sý resýrstary jáne ırrıgatsııa birinshi vıtse-mınıstri Bolat Beknııaz.
Balqash kólin zertteýmen qatar, taraptar Qazaqstannyń batysyndaǵy jerasty sýlarynyń ken oryndarynyń munaımen lastaný turǵysynan zertteý boıynsha yntymaqtastyq múmkindikterin talqylady.
