Qazaqstan men Frantsııa azamattyq avıatsııa salasynda kadr daıarlaý boıynsha kelisimge keldi
ASTANA. KAZINFORM — Memleket basshysy Qasym-Jomart Toqaevtyń kadrlardy daıarlaý júıesin jańǵyrtý jáne halyqaralyq ǵylymı-bilim berý ortalyqtarymen yntymaqtastyqty damytý jónindegi tapsyrmasy aıasynda QR Kólik vıtse-mınıstri Talǵat Lastaev bastaǵan qazaqstandyq delegatsııa Frantsııanyń Azamattyq avıatsııa ulttyq mektebiniń (ENAC) dırektory Olıve Shansý jáne onyń orynbasary Nıkolıa Kalazıspen kezdesý ótkizdi.
Kezdesý barysynda Eýropanyń jetekshi avıatsııalyq mamandar daıarlaý ortalyǵymen Astanada eýropalyq deńgeıdegi óńirlik avıatsııalyq oqý ortalyǵyn ashý máseleleri talqylandy. Atalǵan ortalyq azamattyq avıatsııa salasyndaǵy zamanaýı bilim berý standarttarynyń óńirlik ortalyǵyna aınalmaq. Elde mundaı oqý ortalyǵynyń bolýy salanyń sheteldik oqý uıymdaryna táýeldiligin azaıtyp, elimizde bilikti mamandar daıarlaýǵa múmkindik beredi. Bul yntymaqtastyq sondaı-aq salanyń otandyq kadrlaryn júıeli túrde daıarlaýǵa jáne tájirıbe, bilim men halyqaralyq praktıkalar almasýǵa baǵyttalatyn bolady.
Qazaqstannyń azamattyq avıatsııasy turaqty ósim kórsetip keledi: jyl saıyn jolaýshylar aǵyny artyp, marshrýttyq jeli keńeıip, ınfraqurylym jańǵyrtylyp, áýe kemeler parki ulǵaıyp keledi. Bul protsesterdi qoldaý úshin elge turaqty túrde bilikti mamandar qajet.
Otandyq avıatsııa salasyna jyl saıyn 500-600 maman qajet. Atap aıtqanda, ushqyshtar, ınjenerler, áýe qozǵalysyn basqarý dıspetcherleri, jerústi qyzmetkerlerin jáne basqa da negizgi baǵyttar boıynsha mamandar.
Sonymen qatar Qazaqstanda jumys istep turǵan avıatsııalyq oqý ortalyqtary Eýropalyq ushýlar qaýipsizdigi agenttigi (EASA) belgileıtin ozyq eýropalyq standarttarǵa sáıkes kelmeıdi. Aıta ketý kerek, Azamattyq avıatsııa ulttyq mektebi (ENAC) Halyqaralyq azamattyq avıatsııa uıymy (IKAO), Eýropalyq ushýlar qaýipsizdigi agenttigi (EASA), Halyqaralyq áýe kóligi qaýymdastyǵy (IATA) jáne Halyqaralyq áýejaılar keńesi (ACI) talaptaryna tolyq sáıkes keletin jalǵyz oqý orny.
— Bul bastama Qazaqstannyń azamattyq avıatsııa salasynda joǵary bilikti kadrlardyń tapshylyǵyn joıýǵa jáne onyń aldyn alýǵa baǵyttalǵan, sondaı-aq bul ushýlar qaýipsizdigin arttyrýǵa, memlekettik qadaǵalaýdyń tıimdiligin kúsheıtýge jáne eldiń avıatsııalyq ınfraqurylymyn damytýǵa yqpal etedi, — delingen aqparatta.
Sapar aıasynda ENAC basshylyǵy oqý ornynyń negizgi nysandaryna tanystyrý ekskýrsııasyn ótkizdi. Kezdesý qorytyndysy boıynsha taraptar osy másele boıynsha yntymaqtastyqty jalǵastyrýǵa kelisti.
Aıta keteıik, Azamattyq avıatsııa ulttyq mektebi (ENAC) 1946 jyly Týlýza qalasynda qurylǵan. Búginde ENAC álemniń 100-den astam elimen yntymaqtastyq ornatqan. Sonymen qatar 350-den astam oqý jáne biliktilikti arttyrý baǵdarlamalaryn júzege asyrady.
Buǵan deıin Qazaqstan men Frantsııa ushaq jetkizý týraly kelisim jasasqany týraly jazǵan edik.