Qazaqstan men Frantsııa atom energetıkasy salasyndaǵy yntymaqtastyqty keńeıtpek
ASTANA. KAZINFORM — Qazaqstan Respýblıkasy Atom energııasy jónindegi agenttiginiń tóraǵasy Frantsııanyń Qazaqstandaǵy Tótenshe jáne Ókiletti Elshisi Sılvan Gıogemen kezdesip, atom energetıkasy salasyndaǵy yntymaqtastyqtyń jańa baǵyttaryn talqylady.
Kezdesý barysynda taraptar atom energııasyn beıbit maqsatta paıdalaný salasyndaǵy Qazaqstan–Frantsııa yntymaqtastyǵynyń qazirgi jaǵdaıy men damý perspektıvalaryn, sondaı-aq ulttyq atom salasyna kadr daıarlaý máselelerin qarastyrdy.
Taraptar 2026 jylǵy 23 sáýirde Qazaqstan Prezıdentiniń EDF kompanııasynyń basqarma tóraǵasy ári bas atqarýshy dırektory Bernar Fontanamen ótkizgen kezdesýiniń mańyzyn atap ótti.
«Qazaqstan atom elektr stantsııasyn salý jobasyn iske asyrý barysynda EDF jáne basqa da frantsýz kompanııalaryn mańyzdy áleýetti seriktester retinde qarastyrady. Bul Qazaqstan men Frantsııanyń atom energetıkasy salasyndaǵy yntymaqtastyqty odan ári damytýǵa ózara múddeli ekenin kórsetedi», — dep atap ótildi kezdesý barysynda.
Kezdesýde atom salasy úshin bilikti kadrlar daıarlaý máselesine erekshe nazar aýdaryldy.
Osy oraıda 25–29 mamyr aralyǵynda ıAdrolyq fızıka ınstıtýtynyń bazasynda Frantsııanyń Laýe–Lanjeven ınstıtýtymen birlesip ótkizilgen vorkshoptyń nátıjeleri joǵary baǵalandy. Іs-shara zertteý reaktorlary men zamanaýı neıtrondyq tehnologııalarǵa arnaldy.
Vorkshop qorytyndysynda Qazaqstan Respýblıkasynyń Atom energııasy jónindegi agenttigi men International Institute of Nuclear Energy arasynda ózara túsinistik týraly memorandýmǵa qol qoıyldy.
Qujat mamandar daıarlaý, bilim berý baǵdarlamalaryn damytý, tájirıbe almasý jáne Qazaqstannyń atom salasyn turaqty kadrlyq qamtamasyz etý júıesin qalyptastyrý baǵyttaryndaǵy yntymaqtastyqty kózdeıdi.
Taraptardyń pikirinshe, qol jetkizilgen kelisimderdi iske asyrý Qazaqstan men Frantsııa arasyndaǵy seriktestikti odan ári nyǵaıtyp, ǵylymı-tehnıkalyq yntymaqtastyqty damytýǵa jáne atom energetıkasy úshin jańa býyn mamandaryn daıarlaýǵa múmkindik beredi.
Aıta keteıik, búgin atom salasynyń mamandary joǵary memlekettik nagradalarmen marapattaldy.
