Qazaqstan men Frantsııa atom energetıkasy salasyndaǵy áriptestikti nyǵaıtpaq
ASTANA. KAZINFORM — Parıj Qazaqstannyń atom energetıkasyndaǵy frantsýz kompanııalarynyń qatysýyn talqylaý alańyna aınaldy.
Atom energııasy jónindegi agenttiginiń tóraǵasy Almasadam Sátqalıev bastaǵan qazaqstandyq delegatsııa Frantsııa Respýblıkasyna jumys sapary aıasynda Parıj qalasynda memlekettik organdar men frantsýz atom salasyndaǵy jetekshi kompanııalar ókilderimen birqatar ekijaqty kezdesý ótkizdi.
EDF, Framatome jáne Orano kompanııalarynyń basshylyǵymen ótken kelissózder barysynda Qazaqstandaǵy atom-energetıkalyq jobalardy iske asyrýǵa frantsýz kompanııalarynyń qatysý múmkindikteri, sondaı-aq yntymaqtastyqtyń perspektıvalary ekonomıkalyq tıimdilik pen uzaq merzimdi turaqtylyq turǵysynan talqylandy.
Frantsııanyń ıadrolyq retteý organy - ASNR basshylyǵymen kezdesý barysynda atom salasyn memlekettik retteý, ıadrolyq jáne radıatsııalyq qaýipsizdikti qamtamasyz etý, sondaı-aq AEHA usynymdary men halyqaralyq standarttarǵa sáıkes tájirıbe almasý máseleleri qaraldy. Taraptar retteýshi organdardyń ınstıtýtsıonaldyq táýelsizdiginiń mańyzdylyǵyn atap ótip, saraptamalyq yntymaqtastyqty damytýǵa daıyn ekendikterin bildirdi.
Kadrlyq áleýetti damytý máselelerine erekshe nazar aýdaryldy. I2EN atqarýshy dırektorymen ótken kezdesýde Qazaqstannyń azamattyq ıadrolyq energetıka salasyna arnalǵan mamandardy daıarlaý tásilderi talqylandy. Frantsýz tarapy kadrlyq áleýetti damytýǵa baǵyttalǵan qoldaý baǵdarlamasynyń aldyn ala tujyrymdamasyn usynyp, taraptar kadr daıarlaý jónindegi jol kartasyn birlesip ázirleý týraly ýaǵdalasty.
Sonymen qatar, Frantsııa Respýblıkasynyń Eýropa jáne syrtqy ister mınıstrligi, sondaı-aq ekonomıka, qarjy, ónerkásip, energetıka jáne tsıfrlyq egemendik mınıstrligi ókilderimen kezdesýler ótkizilip, ekijaqty ekonomıkalyq jáne ınvestıtsııalyq yntymaqtastyqty keńeıtý, sondaı-aq ónerkásiptik kooperatsııa máseleleri talqylandy.
Parıj qalasynda ótken kezdesýler Qazaqstan men Frantsııanyń atom energetıkasy salasyndaǵy strategııalyq áriptestikti tereńdetýge jáne birlesken jobalardy iske asyrýǵa ózara múddeliligin rastady.