Qazaqstan men Frantsııa atom energetıkasy boıynsha yntymaqtastyqty kúsheıtedi
ASTANA. KAZINFORM – Qazaqstan men Frantsııa arasyndaǵy atom energııasyn beıbit maqsatta paıdalaný salasyndaǵy yntymaqtastyqty damytý týraly kelisim aıasynda 28–29 shilde kúnderi Frantsııanyń Eýropa jáne syrtqy ister mınıstrliginde atom energııasyn beıbit maqsatta paıdalaný jónindegi ekijaqty komıtettiń otyrysy ótti.
Atom energııasy jónindegi agenttiktiń baspasóz qyzmetiniń habarlaýynsha, komıtettiń maqsaty – ǵylymı-tehnıkalyq jáne ónerkásiptik yntymaqtastyqtyń iske asyrylý barysyn qarastyrý, sondaı-aq ony odan ári damytý perspektıvalaryn aıqyndaý.
Qazaqstan Respýblıkasy Atom energııasy jónindegi agenttiginiń tóraǵasy Almasadam Sátqalıev bastaǵan qazaqstandyq delegatsııa Frantsııanyń Eýropa jáne syrtqy ister mınıstri Jan-Noel Barromen, syrtqy saýda jáne ekonomıkalyq tartymdylyq jónindegi mınıstr-delegat Nıkolıa Forıssemen, sondaı-aq Atom energııasy jáne balamaly energııa kózderi jónindegi komıssarıattyń (CEA) bas dırektory Ann-Izabel Etenvrmen kezdesti.
Qazaqstan men Frantsııa ózara tıimdi strategııalyq áriptestikke negizdelgen energetıka salasyndaǵy yntymaqtastyqtyń berik ári uzaq merzimdi sıpatyn rastady.
Aıta keteıik, Qazaqstan Respýblıkasynyń Prezıdenti Qasym-Jomart Toqaevtyń 2024 jylǵy 5 qarashada Frantsııa Respýblıkasyna jasaǵan memlekettik sapary aıasynda Qazaqstan men Frantsııa arasyndaǵy strategııalyq áriptestikti nyǵaıtý týraly Birlesken deklaratsııaǵa qol qoıyldy.
Aıta keteıik, osyǵan deıin Qazaqstan Respýblıkasy Atom energııasy jónindegi agenttiginiń tóraǵasy Frantsııanyń Qazaqstandaǵy Tótenshe jáne Ókiletti Elshisi Sılvan Gıogemen kezdesip, atom energetıkasy salasyndaǵy yntymaqtastyqtyń jańa baǵyttaryn talqylady.
