Qazaqstan men Frantsııa arasyndaǵy taýar aınalymy 100 mln AQSh dollarynan asty
ASTANA. KAZINFORM — Qazaqstan Respýblıkasy delegatsııasy Aýyl sharýashylyǵy vıtse-mınıstri Amanǵalı Berdalınniń jetekshiligimen Eýropadaǵy eń iri agrarlyq kórmege qatysty.
Halyqaralyq aýyl sharýashylyǵy jármeńke — kórmesi osymen 62 ret ótkizildi. Dástúrli sharaǵa Frantsııadan jáne seriktes elderden myńnan astam fermerler, mal ósirýshiler, óńdeýshi kásiporyndar men agroónerkásiptik ónim óndirýshiler jınaldy. Alań ózara belsendi pikir almasý men naqty kelisimder jasalatyn ortalyqqa aınaldy.
Іskerlik baǵdarlama aıasynda qazaqstandyq delegatsııa veterınarııa, selektsııa, genetıka jáne agroónerkásip keshenin tsıfrlandyrý máseleleri talqylanǵan konferentsııalar men salalyq kezdesýlerge qatysty. Ásirese, saýda-ekonomıkalyq baılanystardy keńeıtýge, salany tehnologııalyq jańǵyrtýǵa jáne mal sharýashylyǵyna zamanaýı sheshimderdi engizýge basa nazar aýdaryldy.
«Frantsııa–Qazaqstan» bıznes-konferentsııasynda sóz sóılegen Amanǵalı Berdalın mal sharýashylyǵyn damytý memlekettik saıasattyń strategııalyq basymdyǵy bolyp qala beretinin atap ótti. Osy jolda 2026–2030 jyldarǵa arnalǵan keshendi jospar bekitildi. Josparda joǵary ónimdi asyl tuqymdy mal satyp alý jáne veterınarııalyq júıeni jańǵyrtý kózdelgen.
— Ótken jyldyń qorytyndysy boıynsha Qazaqstan men Frantsııa arasyndaǵy ózara taýar aınalymy 100 mıllıon AQSh dollarynan asty. Qazaqstan soıa burshaǵyn, ósimdik maılaryn jáne etıl spırtin eksporttaıdy, al azyq-túlik jáne sút ónimderin, shyryndardy ımporttaıdy. Biz genetıka men agrotehnologııadan bastap bilim berý jáne birlesken ǵylymı jobalarǵa deıingi yntymaqtastyqty keńeıtýdi kózdep otyrmyz, — dedi vıtse-mınıstr.
Aıta ketý kerek, praktıkalyq yntymaqtastyq qazirdiń ózinde damyp keledi. SYNETICS kompanııasy Qazaqstannyń salalyq ǵylymı uıymdarymen, sonyń ishinde S. Seıfýllın atyndaǵy Qazaq agrotehnıkalyq ýnıversıtetimen birlesip jumys júrgizýde. Frantsııa tarapy qazaqtyń aqbas jáne áýlıekól tuqymdary boıynsha etti baǵyttaǵy iri qara sharýashylyǵyn damytý baǵdarlamalaryn ázirleý tájirıbesimen bólisýge daıyn ekenin bildirdi.
Kásipkerlik qaýymdastyq ókilderimen kezdesýler barysynda qazaqstandyq jylqy etin Eýropa naryǵyna shyǵarý máselesi boıynsha kelissózder júrgizildi.
Qazaqstan Respýblıkasynyń Aýyl sharýashylyǵy mınıstrligi DGSANTE mekemesimen otandyq ónimderdi Eýropa Odaǵy naryǵyna shyǵarý talaptaryn kelisý baǵytynda júıeli jumys atqarýda. Sonymen qatar akvaósirý jáne ara sharýashylyǵy ónimderin eksporttaý múmkindikteri qarastyrylýda.
Bıoqaýipsizdik salasynda Boehringer Ingelheim kompanııasymen kelissózder ótti. Atalǵan kompanııa QazBioPharm uıymymen birlesip Qazaqstanda aýsylǵa qarsy vaktsınalar óndirý jobasyn júzege asyrǵan.
Sondaı-aq ANSES, INRAE zertteý ınstıtýty jáne SEMAE tuqym sharýashylyǵy kompanııalarynyń birlestigimen kezdesýler ótti. Selektsııa, jemshóp óndirisi jáne ınnovatsııalyq sheshimderdi engizý baǵytyndaǵy yntymaqtastyq perspektıvalary talqylandy.
Bilim berý salasy da nazardan tys qalǵan joq. S. Seıfýllın atyndaǵy Qazaq agrotehnıkalyq ýnıversıtetiniń rektory Qanat Tireýov Frantsııanyń agrarlyq ýnıversıtetteri birlestigi men ulttyq veterınarııalyq ınstıtýttary ókilderimen kezdesý barysynda Qazaqstanda jelilik agrotehnopark ashylǵanyn ata ótti. Bul ortalyq birlesken ǵylymı zertteýler júrgizýge jáne jańa býyn mamandaryn daıarlaýǵa múmkindik beredi.
Qazaqstannyń Halyqaralyq aýyl sharýashylyǵy kórmesine qatysýy Frantsııamen áriptestikti tereńdetýge, agroónerkásip keshenin jańǵyrtýǵa jáne eldiń eksporttyq áleýetin nyǵaıtýǵa baǵyttalǵan júıeli saıasatty aıqyn kórsetkishi.
Aıta ketelik AShM fermerlerge tikeleı sýbsıdııa berý tetikterin túsindirgen edi.