Qazaqstan men Frantsııa AÓK salasynda yntymaqtastyq jónindegi Jol kartasyn bekitti
ASTANA. KAZINFORM — Aýyl sharýashylyǵy mınıstri Aıdarbek Saparov Frantsııaǵa jumys sapary aıasynda Frantsııanyń aýyl sharýashylyǵy, agroónerkásip jáne azyq-túlik qaýipsizdigi mınıstri Annı Jenevarmen kezdesti, dep habarlaıdy QR AShM baspasóz qyzmeti.
Kezdesý barysynda taraptar agroónerkásiptik keshen salasyndaǵy ekijaqty yntymaqtastyqtyń qazirgi ahýaly men damý bolashaǵyn, sondaı-aq aýyl sharýashylyǵy ónimderiniń ózara saýdasyn keńeıtý, ınvestıtsııalyq yqpaldastyq jáne zamanaýı tehnologııalar boıynsha tájirıbe almasý baǵyttaryn talqylady.
Aıdarbek Saparov Frantsııanyń Eýropalyq odaq elderi arasyndaǵy Qazaqstannyń negizgi seriktesteriniń biri ekenin atap ótti.
— Biz ekijaqty dostyq qarym-qatynasty joǵary baǵalaımyz jáne agrarlyq saladaǵy yntymaqtastyqty odan ári nyǵaıtýǵa múddelimiz. Búginde Qazaqstan agrosektordy júıeli túrde jańǵyrtyp, zamanaýı tehnologııalardy engizýge, qaıta óńdeý salasyn damytýǵa, eńbek ónimdiligin arttyrýǵa jáne eksporttyq áleýetti keńeıtýge aıryqsha nazar aýdaryp otyr. Osy rette Frantsııanyń aýyl sharýashylyǵy salasyndaǵy tájirıbesi men quzyreti biz úshin erekshe mańyzdy, — dedi mınıstr.
Kezdesý barysynda eki el arasyndaǵy saýda-ekonomıkalyq yntymaqtastyqty nyǵaıtý jáne AÓK ónimderiniń ózara taýar aınalymyn arttyrý máselelerine aıryqsha nazar aýdaryldy.
Ótken jyldyń qorytyndysy boıynsha atalǵan salada Qazaqstan men Frantsııa arasyndaǵy taýar aınalymy 103,2 mln AQSh dollaryn qurady.
Qazaqstan negizgi bóligin soıa burshaqtary, etıl spırti, efır maılary, tabıǵı shellak jáne kúnbaǵys maıy quraıdy. Sonymen qatar, qazaqstandyq tarap frantsýz naryǵyna jylqy eti men bal eksporttaýǵa daıyn ekenin bildirdi.
Agroónerkásip salasyndaǵy ınvestıtsııalyq yntymaqtastyqtyń damý qarqyny da nazardan tys qalmady.
Atap aıtqanda, frantsýzdyq Lactalis jáne Danone kompanııalary Qazaqstanda óndiristik oryndaryn jańǵyrtýǵa, qaıta óńdeýdiń zamanaýı tehnologııalaryn engizýge jáne qosylǵan quny joǵary ónim óndirisin keńeıtýge baǵyttalǵan iri ınvestıtsııalyq jobalardy tabysty júzege asyryp keledi.
Óz kezeginde Annı Jenevar frantsýz tarapynyń Qazaqstanmen agrarlyq salada, selektsııa, tuqym sharýashylyǵy jáne ózge de baǵyttar boıynsha yqpaldastyqty odan ári tereńdetýge yntaly ekenderin jetkizdi.
Kezdesý nátıjesinde qos tarap eki eldiń mınıstrlikteri arasynda agrarlyq saladaǵy ózara yntymaqtastyqty nyǵaıtý deklaratsııasyna jáne Jol kartasyna qol qoıdy.
— Biz bul qujattardy ekijaqty is-qımyldy nyǵaıtýǵa, yqpaldastyqtyń jańa baǵyttaryn damytýǵa jáne uzaqmerzimdi seriktestik qalyptastyrýǵa baǵyttalǵan mańyzdy naqty qadam retinde baǵalaımyz. Jol kartasyn iske asyrý salalyq vedomstvolar, bıznes qaýymdastyqtar men ǵylymı uıymdar arasyndaǵy baılanysty jandandyryp, ózara saýdany keńeıtýge, tehnologııa almasýǵa jáne AÓK salasyndaǵy birlesken ınvestıtsııalyq jobalardy júzege asyrýǵa serpin beredi dep senemin, — dedi Aıdarbek Saparov.
Buǵan deıin 2031 jylǵa deıin Abaı oblysynda 90 aýyl sharýashylyǵy jobasy júzege asyrylatynyn jazǵanbyz.
