Qazaqstan men Frantsııa temirjol salasyn tsıfrlandyrý týraly mámile jasady
NUR-SULTAN. QazAqparat – Frantsııanyń ekonomıka jáne qarjy mınıstri Brıýno Le Merdiń Qazaqstanǵa sapary aıasynda «Qazaqstan temir joly» UK» AQ men «Alstom» kompanııasy memorandým bekitti, dep habarlaıdy QazAqparat tilshisi.
Qujatqa «QTJ» UK» AQ tóraǵasynyń birinshi orynbasary Qanat Álmaǵambetov pen «Alstom» kompanııasy Taıaý Shyǵys, Afrıka jáne Ortalyq Azııa aımaǵynyń aǵa vıtse-prezıdenti Dıde Pfleger qol qoıdy.
Qos tarap temirjol dabyly, buǵattaý jáne ortalyqtandyrý tsıfrlyq tehnologııalaryn damytý salasynda yntymaqtastyq ornatýǵa nıetti.
«Alstom» men QTJ arasyndaǵy memorandýmnyń negizgi maqsaty – temirjol kóligindegi tsıfrlandyrý men avtomattandyrý protsesterindegi yntymaqtastyq bolyp otyr. Ondaǵy eń alǵashqy qadam – iri stantsııalardy avtomattandyrý nemese dabyl júıesin ornatý bolmaq. Ári qaraı temirjol kólikterindegi tsıfrlandyrý boıynsha jumys isteımiz. Ózderińiz bilesizder, bizdiń kompanııanyń birneshe jobasy «Tsıfrlyq Qazaqstan» memlekettik baǵdarlamasyna engen», - dedi «QTJ» UK» AQ bas ınjeneri Batyr Kotyrev astanadaǵy «Elektrovoz qurastyrý zaýytynda» tilshilerge bergen suhbatynda.
Onyń aıtýynsha, qazirgi temirjol qurylǵylary 35-40 jyldan beri qoldanylyp keledi.
«Árıne, olar qozǵalys qaýipsizdigi talaptaryna saı. Biraq, búkil álem úzdiksiz damyp keledi, zamanaýı júıeler paıda boldy. Sońǵy birneshe jylda 2,5 myń shaqyrym jańa temirjol saldyq, onda tsıfrlyq temirjol talaptaryna saı zamanaýı júıeler qoldanylady. Qazir biz «Alstom» kompanııasynyń dabyl qaǵý júıesin qoldaný múmkindigin qarastyryp otyrmyz», - dedi ol.
Aıta keteıik, Frantsııanyń ekonomıka jáne qarjy mınıstri Brıýno Le Mer elordaǵa resmı saparmen keldi.
Búgin frantsııalyq mınıstr QR Prezıdenti Qasym-Jomart Toqaevpen, QR Premer-Mınıstri Asqar Mamınmen jáne QR Premer-Mınıstriniń orynbasary Jeńis Qasymbekpen kezdesedi.
