Qazaqstan men Frantsııa ǵarysh pen qorǵanys ónerkásibindegi yntymaqtastyqty keńeıtedi

ASTANA. QazAqparat - Astanada QR Qorǵanys jáne aeroǵarysh ónerkásibi mınıstri Beıbit Atamqulovtyń Frantsııa Respýblıkasynyń Eýropa men syrtqy ister mınıstrliginiń memlekettik hatshysy Jan-Batıst Lemýanmen kezdesýi ótti, dep habarlaıdy «QazAqparat» HAA tilshisi.

Sondaı-aq, kelissózderge Frantsııanyń Qazaqstan Respýblıkasyndaǵy Tótenshe jáne Ókiletti Elshisi Fransıs Eten men Frantsııadaǵy Qazaqstannyń Tótenshe jáne Ókiletti Elshisi Nurlan Dánenov qatysty, dep habarlaıdy QR QAÓM baspasóz qyzmeti.
 

Kezdesý barysynda Qazaqstan men Frantsııanyń strategııalyq seriktesteri bolyp tabylatyn ǵarysh salasyndaǵy qarym-qatynasty nyǵaıtý jáne keńeıtý máseleleri talqylandy.

2009 jyly frantsýzdyq seriktestermen birlesip, joǵary jáne orta keńistiktik jıiliktegi «KazEOSat-1» jáne «KazEOSat-2» atty eki spýtnıkten turatyn Jerdi qashyqtyqtan baqylaý qazaqstandyq ǵarysh júıesi qurylyp, tabysty jumys istep keledi. Astanada eýropalyq ǵarysh tehnologııasy transfertiniń kómegimen ǵarysh qurylǵylaryn zamanaýı qurastyrý-synaqtan ótkizý kesheni salynyp jatyr.
 

Frantsııa Respýblıkasynyń Eýropa men syrtqy ister mınıstrliginiń memlekettik hatshysy Jan-Batıst Lemýan Qazaqstan men Frantsııanyń arasynda dostyq qarym-qatynastyń ornaǵanyn atap ótip, qonaqjaılylyq pen tabysty kezdesý úshin alǵysyn bildirdi.
 

QR Qorǵanys jáne aeroǵarysh ónerkásibi mınıstri ǵarysh jáne qorǵanys ónerkásibi salasyndaǵy yntymaqtastyqtyń odan ári damýyna senim bildirip, frantsýzdyq kompanııalardy 2017 jyldyń qazan aıynda ótetin «Qazaqstandaǵy ǵarysh kúnderi» halyqaralyq forýmyna jáne 2018 jyldyń mamyr aıynda Astanada bolatyn «KADEX-2018» kórmesine qatysýǵa shaqyrdy.
 

Sondaı-aq, Jan Batıst Lemýan Qazaqstandaǵy frantsýz elshisimen birge Ulttyq ǵarysh ortalyǵyn aralady.