Qazaqstan men Frantsııa dárigerleri AITV juqtyrǵandardy birlese emdeýge ýaǵdalasty
ASTANA. QazAqparat - Qazaqstanǵa is saparmen kelgen frantsııalyq dárigerler Astanadaǵy SPID-ke qarsy kúres ortalyǵynda boldy, dep habarlaıdy QazAqparat.
«Frantsııanyń Qoǵamdyq densaýlyq saqtaý jáne epıdemıologııa ınstıtýtynyń, JITS jáne vırýstyq gepatıtterdi zertteý boıynsha Ulttyq agenttiginiń dárigerleri ortalyq mamandarymen kezdesip, ózara tájirıbe almasty. Kezdesý barysynda ortalyqtaǵy halyqtyń osal toby men AITV (adamdaǵy ımmýn tapshylyǵy vırýsy) juqtyrǵandar arasynda aldyn alý jumysy men saraptamanyń qalaı júzege asatyndyǵy jáne juqpa anyqtalǵan naýqasqa qalaı em taǵaıyndalatyny jóninde oı bólisti. Dárigerler aýrýdyń da, olarǵa taǵaıyndalatyn dári-dármektiń de ortaq ekendigine toqtala kele, bolashaqta birigip jumys isteýge, tájirıbe almasýǵa daıyn ekenderin aıtty», - delingen ortalyq taratqan aqparatta.
Ortalyq málimetinshe, kezdesý barysynda frantsııalyq Domınık Kostaglıo óz elinde Qazaqstandaǵydaı «SPID ortalyǵy» dep atalatyn oqshaýlanǵan jeke dara ortalyqtardyń joq ekendigin aıtqan. ıAǵnı, turǵyndar óz erikterimen kez kelgen emhanaǵa baryp, qan taldamasyn jasatý arqyly óz statýsyn anyqtatyp, sondaǵy mamandarǵa qaralady.
«Biz úshin SPID úreı týǵyzyp, úrke qaraıtyndaı syrqat emes. Basqa da sozylmaly aýrýlardyń qataryndaǵy syrqat sııaqty qaraımyz. Qan quramynan AITV juqpasy anyqtalǵan eken, ol adam esepke turyp, dári-dármegin qabyldap, ádettegideı ómirin jalǵastyra beredi», - deıdi meıman.
«Taǵy bir ereksheligi Frantsııada qan quramynan AITV anyqtalǵan sheteldik azamattarǵa da tegin qyzmet kórsetiledi. Aıta keterligi, 60 mıllıon halqy bar Frantsııa memleketinde qazir 153 myń AITV juqpasymen aýyratyn naýqas resmı tirkeýde. Bul bizdegi kórsetkishten 5 ese kóp dep aıtýǵa bolady», - dedi ortalyqtan.
Dóńgelek ústel basynda pikir almasqan eki jaqtyń dárigerleri atalǵan derttiń aldyn alý jumystarynda da bir-birinen úırenerleri kóp ekendigine toqtalǵan.
