Qazaqstan men Fınlıandııa prezıdentteri telefon arqyly sóılesti
ASTANA. KAZINFORM – Fın tarapynyń bastamasymen Prezıdent Qasym-Jomart Toqaev pen Fınlıandııa Respýblıkasynyń Prezıdenti Aleksandr Stýbb telefon arqyly sóılesti.
Memleketter basshylary ekijaqty yntymaqtastyqtyń qazirgi jaı-kúıi men damý perspektıvasyn talqylap, saýda-ekonomıkalyq jáne mádenı-gýmanıtarlyq baılanystardy odan ári nyǵaıtýǵa qos taraptyń da beıil ekenin rastady.
Eki el arasyndaǵy qarym-qatynasqa tyń serpin berý úshin Fınlıandııa Prezıdenti bıyl qazan aıynda Qazaqstanǵa saparmen kelýge daıyn ekenin jetkizdi. Sondaı-aq aldaǵy kezeńge josparlanǵan joǵary deńgeıdegi kelissózderdiń mazmunyn baıytýdyń mańyzyna nazar aýdaryldy. Onyń qorytyndysy qazaq-fın seriktestiginiń jańa kezeńine jol ashady.
Sonymen qatar Qasym-Jomart Toqaev pen Aleksandr Stýbb birqatar ózekti halyqaralyq máseleler boıynsha pikir almasty. Taraptar ornyqty damýdy qamtamasyz etý, jahandyq beıbitshilik pen qaýipsizdikti ilgeriletý maqsatynda kópjaqty uıymdar aıasyndaǵy kúsh-jigerdi úılestirýdiń mańyzyn atap ótti.
Buǵan deıin Prezıdent Darıǵa Tilendıevanyń týǵan-týystary men jaqyndaryna kóńil aıtqan bolatyn.