Qazaqstan men Fınlıandııa arasyndaǵy áýe qatynasy keńeıedi
ASTANA. QazAqparat - Memleket basshysy Nursultan Nazarbaevtyń Fınlıandııaǵa sapary aıasynda eki el arasynda áýe qatynasy boıynsha ekijaqty memorandýmǵa qol qoıyldy, dep habarlaıdy QazAqparat QR IDM Azamattyq avıatsııa komıtetine silteme jasap.
Oǵan sáıkes, Qazaqstanǵa reıster oryndaǵan kezde fın tasymaldaýshysyna qosymsha kommertsııalyq quqyqtar berildi. Atap aıtqanda, fın tasymaldaýshysyna Almaty men Astanaǵa 7 reıs oryndaý jáne kez kelgen tıptegi áýe kemesin qoldaný quqyǵy berildi (syıymdylyq shekteýinsiz).
Jańa kelisim eki el arasyndaǵy saýda-ekonomıkalyq yntymaqtastyqty, týrızm men iskerlik seriktestikti damytýǵa múmkindik beredi. Sonymen qatar, Astananyń tranzıttik-kóliktik hab retinde tanylyp, keńeıýine jol ashady.
Aıta ketý kerek, 2017 jyly qazaqstandyq tarap «Finn Air» áýe kompanııasyna Helsınkı-Astana marshrýty boıynsha jıiligi aptasyna (kúndelikti) 7 reıs ushý quqyǵyn bergen bolatyn.
Jazda «Finn Air» áýe kompanııasy Helsınkı-Astana marshrýty boıynsha Qazaqstanǵa jıiligi aptasyna 2 rettik tikeleı reıs oryndaı bastady. 2018 jyly 3 shilde men 23 tamyz aralyǵynda «Finn Air» áýe kompanııasy A319 áýe kemesimen Astana - Helsınkı marshrýty boıynsha aptasyna 2 reısten oryndady.
