Qazaqstan men Fınlıandııa arasynda tikeleı áýe reısi ashyldy
ASTANA. QazAqparat - Qazaqstan men Fınlıandııa arasynda tikeleı áýe qatynasy ashyldy, dep habarlaıdy QazAqparat.
«Finnair» áýe kompanııasy Helsınkiden Astanaǵa alǵashqy reısti oryndady. Qazaqstan men Fınlıandııa arasyndaǵy tikeleı reıs aptasyna eki ret, sársenbi jáne juma kúnderi qatynaıdy. Atalmysh reısterdi oryndaıtyn Airbus 319 áýe kemesi Astanadan jergilikti ýaqyt boıynsha saǵat 05:40-ta ushady.
«Eki el arasyndaǵy reısti ashýda QR IDM Azamattyq avıatsııa komıteti men Fınlıandııanyń avıatsııalyq bıligi birlese jumys atqardy. Halyqaralyq EKSPO-2017 kórmesiniń ótýine baılanysty fın tarapyna aptasyna 7 reıs oryndaý quqyǵy berildi.
Aıta keteıik, birinshi reıspen Fınlıandııanyń syrtqy saýda jáne damý mınıstri Kaı Mıýkkıanen bastaǵan delegatsııa Astanaǵa keldi. Sonymen qatar, jaqyn arada Fınlıandııa prezıdenti Qazaqstanǵa saparlaıdy dep kútilýde»,-dep atap ótilgen QR IDM málimetinde.
JACDEC zertteý bıýrosynyń aqparaty boıynsha Fınlıandııanyń «Finnair» iri áýe kompanııasy 2012-2013 jyldary Eýropadaǵy eń qaýipsiz áýe kompanııasy atanǵan jáne qaýipsizdik jóninen álem boıynsha ekinshi oryndy ıelengen.
