Qazaqstan men Fınlıandııa arasynda qosarlanǵan salyqty boldyrmaý týraly kelisim qabyldandy - Parlament
ASTANA. Mamyrdyń 13-i. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń Úkimeti men Fınlıandııa Respýblıkasynyń Úkimeti arasyndaǵy Tabysqa salynatyn salyqtarǵa qatysty qosarlanǵan salyq salýdy boldyrmaý jáne
salyq salýdan jaltarýǵa jol bermeý týraly kelisimdi jáne oǵan Hattamany ratıfıkatsııalaý týraly» zańdy qabyldady. Endi qujat Memleket basshysynyń qol qoıýyna jiberiledi, dep habarlaıdy QazAqparat.
2009 jyldyń naýryzynda Helsınkı qalasynda qol qoıylǵan osy Kelisimniń maqsaty Qazaqstan men Fınlıandııa arasyndaǵy ekonomıkalyq yntymaqtastyqty ınvestıtsııalar úshin qolaıly jaǵdaılar jasaý arqyly nyǵaıtý jáne keńeıtý bolyp tabylady. Kelisim Ýaǵdalasýshy memleketterdiń biriniń nemese ekeýiniń rezıdenti bolyp tabylatyn tulǵalarǵa qoldanylady. Qujat aıasynda Ýaǵdalasýshy memlekettiń nemese onyń jergilikti bılik organdarynyń atynan alynatyn tabysqa salynatyn salyqtarǵa olardy alý ádisine qaramastan qoldanylatyn bolady.
Jyljymaly nemese jyljymaıtyn múlikti ıelikten shyǵarýdaǵy tabystarǵa salynatyn salyqtardy qosa alǵanda, tabystyń jalpy somasynan nemese tabystyń jeke bólikterinen alynatyn salyqtardyń barlyq túrleri tabysqa salynatyn salyqtar bolyp sanalady.
