Qazaqstan men FAO shegirtkemen birlesip kúresý jóninde kelisti

RIM. QazAqparat – QR Aýyl sharýashylyǵy mınıstri Erbol Qarashókeev Rımdegi jumys sapary aıasynda Birikken Ulttar Uıymynyń Azyq-túlik jáne aýylsharýashylyǵy uıymynyń (FAO) halyqaralyq shegirtkege qarsy ortalyǵyna bardy, dep habarlaıdy QazAqparat.

AShM Agroónerkásiptik keshendegi memlekettik ınspektsııa komıtetiniń málimetine sáıkes, ortalyq alańynda zııankestermen kúres salasyndaǵy birlesken jobalardy iske asyrý máseleleri talqylandy.

Atap aıtqanda, drondardy paıdalana otyryp, jándikterdi anyqtaý aýmaqtarynyń monıtorıngin engizý týraly sóz boldy. Bul bolashaqta jerdi fıtosanıtarııalyq óńdeýdi dálirek júrgizýge múmkindik beredi.

AShM basshysy sondaı-aq, Eýrazııa óńirindegi tabyn zııankesterimen kúres máselelerin neǵurlym jedel jáne tıimdi sheshýge járdemdesetin FAO-nyń shegirtkeler jónindegi turaqty komıssııasyn qurý ıdeıasyn qoldady.

Aıta keteıik, Avstralııa men Marokko shegirtkelermen kúresýdiń ozyq tájirıbesine ıe. Erbol Qarashókeev mınıstrliktiń qazaqstandyq mamandardy Marokkoǵa oqýǵa jiberý jospary baryn habarlady, sondaı-aq vedomstvoda tájirıbe almasý úshin marokkolyq sarapshylardy bizdiń elge shaqyrý múmkindigi qarastyrylyp jatyr.