Qazaqstan men FAO arasyndaǵy seriktestik baǵdarlamasy ázirlenýde
Taraptar Qazaqstandaǵy etti mal sharýashylyǵyn damytý baǵdarlamasyn talqylady.
FAO-nyń Bas dırektory Aýyl sharýashylyǵy mınıstrliginiń atalǵan maqsattaǵy pozıtsııasyn qoldady jáne osy maqsattarǵa qol jetkizý úshin Qazaqstannyń agrarlyq ǵylymy men bilimin damytý qajet dep atap ótti.
Qazaqstan men FAO arasyndaǵy yntymaqtastyq keńeıýde jáne jańa deńgeıge kóterilýde. Mysaly, FAO Qazaqstandaǵy birneshe jobalardy iske asyrady, olar: organıkalyq aýyl sharýashylyǵyn damytý, jaıylymdardy basqarý, shegirtkemen kúres, turaqty damý maqsattaryn ulttandyrý, azyq-túlik tizbekteriniń damýyn qoldaý jáne eksport, tsıfrlandyrý jáne aqparattyq-kommýnıkatsııalyq tehnologııalardy engizý.
2015 jyldyń sońynda óndiristi damytýǵa jaǵdaı jasaıtyn jáne organıkalyq ónimderdiń eksportyn ulǵaıtatyn «Organıkalyq ónimderdi óndirý týraly» zań qabyldandy. Qytaı men eýropalyq elder qazirdiń ózinde qazaqstandyq organıkalyq ónimderge qyzyǵýshylyq tanytýda.
FAO usynatyn aqparattyq resýrstardy paıdalaný, tehnıkalyq jáne konsýltatsııalyq qoldaý, Qazaqstannyń agroónerkásip kesheni salasyn damytýda óte mańyzdy oryn alady.
Qazirgi ýaqytta Qazaqstan men FAO arasyndaǵy seriktestik baǵdarlamasy ázirlenýde.
Anyqtama: Birikken Ulttar Uıymynyń Azyq-túlik jáne aýylsharýashylyq uıymy (FAO) BUU júıesiniń múshesi bolyp tabylady jáne halyqaralyq azyq-túlik qaýipsizdigi men aýyl sharýashylyǵyn damytý máselelerimen aınalysady. FAO tamaqtaný, azyq-túlik jáne aýyl sharýashylyǵy týraly aqparatty jınaıdy, taldaıdy, túsindiredi jáne taratady. Uıymnyń fýnktsııasyna múshe elderge tehnıkalyq kómek kórsetý kiredi. Qazirgi ýaqytta FAO-nyń quramyna 197 memleket kiredi.