Qazaqstan men EYU elderi arasyndaǵy taýar aınalymy 34,8 paıyzǵa ósti

TAShKENT. QazAqparat - 2022 jyldyń 11 aıynda Qazaqstan men Ekonomıkalyq yntymaqtastyq uıymyna múshe elder arasyndaǵy ózara saýda 34,8%-ǵa ósip, 8,5 mlrd dollardy qurady. Bul týraly Tashkentte ótip jatqan EYU Syrtqy ister mınıstrleri keńesiniń 26-shy otyrysy aıasynda Qazaqstan Respýblıkasy Syrtqy ister mınıstri Muhtar Tileýberdi málimdedi, dep habarlaıdy QazAqparat tilshisi.

Mınıstr Uıymǵa kirgen sátten bastap EYU-men yntymaqtastyq Qazaqstannyń syrtqy saıasatynyń negizgi basymdyqtarynyń biri bolǵanyn atap ótti. EUY jáne onyń bastamalary 30 jyldan astam ýaqyt boıy Qazaqstanǵa únemi qoldaý kórsetip keledi.

«Prezıdentimiz Qasym-Jomart Toqaev ótken jyly EYU-nyń barlyq derlik elderi – Ózbekstan, Ázerbaıjan, Iran, Qyrǵyzstan, Túrikmenstan jáne Túrkııaǵa memlekettik jáne resmı saparlarmen baryp,onda naqty kelisimderge qol jetkizildi. Búgin biz 2021 jyly Qazaqstan men EYU elderi arasyndaǵy taýar aınalymy 37,1%-ǵa (2020 jyly – 5,6 mlrd dollar, 2021 jyly – 7,6 mlrd dollar) óskenin qýana habarlaımyz. 2022 jyldyń 11 aıynda ózara saýda kórsetkishteri de 34,8%-ǵa ósip, 8,5 mlrd dollardy qurady», - dedi M.Tileýberdi.

Osy turǵyda SІM basshysy Qazaqstan EYU-nyń kólik-logıstıkalyq quramdas bóliginiń mańyzdylyǵyn únemi atap ótkenin eske saldy. Onyń aıtýynsha, júkterdi tasymaldaýǵa da, shyǵystan batysqa jolaýshylardy tasymaldaýǵa da qolaıly EYU-nyń biregeı geografııalyq artyqshylyqtaryn tıimdi paıdalaný EUY elderi ekonomıkasynyń damýyna aıtarlyqtaı serpin bere alady.

«Bolashaǵy zor baǵyttardyń biri – Soltústik-Ońtústik dálizi, onyń shyǵys tarmaǵy Qazaqstan-Túrikmenstan-Iran temir jolynyń ýchaskesi. 2022 jyly bul baǵyt boıynsha 130 myń tonnaǵa jýyq júk tasymaldandy, bul 2021 jylmen salystyrǵanda 10 ese kóp. Bul dálizdi maqsatty jáne dáıekti damytý arqyly ótkizý qabiletin jylyna 10 mln tonnaǵa deıin arttyrýǵa bolady», - dedi spıker.

Mınıstr óz sózinde Qazaqstan EYU-ǵa múshe kóptegen memleketter sııaqty Aýǵanstandaǵy jaǵdaıǵa alańdaıtynyn jáne álemdik qaýymdastyqtyń osy eldegi jaǵdaıdy turaqtandyrýǵa kúsh-jigerine múmkindiginshe úles qosyp jatqanyn atap ótti.

«Biz aýǵan halqyna turaqty túrde gýmanıtarlyq kómek kórsetip kelemiz, aýǵan jastaryn Qazaqstannyń oqý oryndarynda oqytý boıynsha ulttyq jáne halyqaralyq baǵdarlamalardy júzege asyramyz. Aýǵanstan halyqaralyq qaýymdastyqtyń odan ári qoldaýyn qajet etetini anyq. Biz Aýǵanstan basshylyǵymen gýmanıtarlyq jáne saýda salalarynda yntymaqtastyqty jalǵastyrý mańyzdy dep sanaımyz», - dedi M.Tileýberdi.