Qazaqstan men EYDU 2015-2016 jyldarǵa arnalǵan Eldik yntymaqtastyq baǵdarlamasyn júzege asyrýǵa kelisti
ASTANA. QazAqparat - Búgin Davosta Dúnıejúzilik ekonomıkalyq forým aıasynda Qazaqstan Respýblıkasynyń Premer-Mınıstri Kárim Másimov pen Ekonomıkalyq yntymaqtastyq jáne damý uıymynyń (EYDU) Bas hatshysy Anhel Gýrrıa QR Úkimeti men EYDU arasyndaǵy 2015-2016 jyldarǵa arnalǵan Eldik yntymaqtastyq baǵdarlamasyn júzege asyrý týraly Memorandýmǵa qol qoıdy. Bul týraly resmı primeminister.kz saıtynda habarlandy.
Baǵdarlama reformalar júrgizýdi, sondaı-aq Qazaqstannyń áleýmettik-ekonomıkalyq damýynyń basty salalaryndaǵy iri jobalardy júzege asyrýdy qarastyrady. Eldik baǵdarlama Qazaqstannyń EYDU-nyń birqatar deklaratsııalary men usynystaryna qosylýyna, onyń qurylymdyq bólimderiniń jumysyna qatysýyna múmkindik beredi.
QR men EYDU eki jaqty yntymaqtastyǵy memlekettik basqarý júıesindegi, bilim berý, densaýlyq saqtaý, jumyspen qamtý, qazynalyq saıasat salalaryndaǵy eldiń básekege qabilettiligin arttyrýǵa múmkindik berip, iskerlik ahýaldy jaqsartady. Qazaqstan EYDU Eldik yntymaqtastyq baǵdarlamalaryn alǵash ret birlesip ázirlegen tórt eldiń biri boldy. Qol qoıý qorytyndysy boıynsha Kárim Másimov «Eldik baǵdarlamany júzege asyrý - Qazaqstannyń 2050 jylǵa qaraı álemniń 30 damyǵan memleketiniń qataryna kirýiniń uzaq merzimdi tapsyrmasyna jetý úshin EYDU elderiniń ozyq tájirıbelerin engizýge yntasyn rastaıtyn eki jaqty ózara is-qımyldyń strategııalyq mańyzdy kezeńi» ekenin basa aıtty. Óz kezeginde Anhel Gýrrıa qol qoıylǵan qujattyń mańyzdylyǵyn atap ótti. «Qazaqstan - Ortalyq Azııadaǵy kóshbasshy ekonomıkasy bar, strategııalyq turǵydan Eýropa men Azııa túıisken jerde ornalasqan el. Eldik baǵdarlamany júzege asyrýdyń jaǵymdy áseri óńirdegi basqa da elderdegi reformalarǵa óz paıdasyn ákeletinine senimdimin», - dedi EYDU Bas hatshysy.
