Qazaqstan men ExxonMobil munaı-gaz jobalary boıynsha ózara is-qımyldy kúsheıtedi
ASTANA. KAZINFORM — Qazaqstan Respýblıkasynyń premer-mınıstri Oljas Bektenov ExxonMobil kompanııasynyń aǵa vıtse-prezıdenti Pıter Lardenmen kezdesý ótkizdi, dep habarlaıdy Úkimettiń baspasóz qyzmeti.
Munaı-gaz salasyndaǵy yntymaqtastyq, ınfraqurylymdy damytý jáne ozyq tehnologııalardy engizý josparlary talqylandy, túrli baǵyttar boıynsha ózara is-qımyldy keńeıtý perspektıvalary qaraldy.
Kezdesý barysynda Teńiz jáne Qashaǵan ken oryndaryn qosa alǵanda, negizgi birlesken jobalardyń aǵymdaǵy mártebesi men iske asyrylý barysyna, sondaı-aq Kaspıı qubyr konsortsıýmynyń qubyr júıelerin odan ári paıdalanýǵa nazar aýdaryldy. Ásirese, Qazaqstannyń álemdik energetıkalyq naryqtaǵy pozıtsııasyn nyǵaıta túsetin Teńiz kenishindegi bolashaq keńeıtý jobasynyń iske qosylýy erekshe atap ótildi.
Premer-mınıstr taýarlar boıynsha lokalızatsııalaý deńgeıi jetkiliksiz bolyp qalatyn Teńiz jobasy sheńberinde taýarlardy, jumystar men kórsetiletin qyzmetterdi satyp alýdaǵy jergilikti qamtý úlesin ulǵaıtý jónindegi kúsh-jigerdi jandandyrý qajettigin atap ótti.
— Taraptar Qashaǵan ken ornyn ıgerý kezeńderin iske asyrýdy, onyń ishinde óndirý kólemin ulǵaıtý jáne qýattylyǵy jylyna 2,5 mlrd m3 gaz óńdeý zaýytyn salý josparlanyp otyrǵan 2A kezeńin iske asyrý daıyndyǵyn talqylady. 2B kezeńin iske asyrý boıynsha jedel sheshim qabyldaýdyń mańyzdylyǵy atap ótildi. Jalpy, joba iske qosylǵan sátten bastap ken ornynda shamamen 906 mln barrel munaı jáne 75 mlrd m3 gaz óndirildi, jalpy alynatyn qorlary shamamen 15,885 barrel munaı jáne 1,4 trln m3 gazdy quraıdy, — delingen habarlamada.
Budan bólek, qazaqstandyq munaıdy syrtqy naryqtarǵa tasymaldaýda sheshýshi ról atqaratyn Kaspıı qubyr konsortsıýmynyń munaı qubyrynyń turaqty jáne úzdiksiz jumysyn qamtamasyz etý máseleleri qaraldy.
Kezdesý sońynda taraptar seriktestikti nyǵaıtýǵa jáne iri ınvestıtsııalyq jobalardy iske asyrýǵa baǵyttalǵan ashyq jáne syndarly dıalogqa daıyn ekendikterin jetkizdi.
Buǵan deıin premer-mınıstr Oljas Bektenov pen FAO-nyń bas dırektory Tsıýı Dýnıý azyq-túlik qaýipsizdigindegi birlesken jobalardy talqylady.