Qazaqstan men Eýropanyń alys-berisi tómendep keledi
ASTANA. QazAqparat - Qazaqstan men Eýropalyq odaq elderi arasyndaǵy taýar aınalymy jyl ótken saıyn tómendep keledi, dep xabarlaıdy QazAqparat tilshisi.
Resmı málimetke sáıkes, ótken jyly eki jaqty saýda-sattyqtyń kólemi 24,1 mlrd. AQSh dollaryn qurady. Sonyń ishinde 18,4 mlrd. eksport bolsa, 5,7 mlrd. dollar - ımport. Atalǵan kórsetkish Qazaqstannyń jalpy syrtqy saýdasynyń 50 paıyzyn alyp otyr. Degenmen, 2015 jyly Qazaqstan men Eýropanyń taýar aınalymy 31,3 mlrd. dollar (24 mlrd. - ekport, 6,9 mlrd. - ımport) bolǵan. Al 2014 jyly ózara alys-beristiń kólemi 53 mlrd. dollarǵa (44,4 mlrd. - eksport, 8,6 mlrd. - ımport) deıin jetken bolatyn. «Taýar aınalymynyń tómendeýine munaı men metall baǵalarynyń kúrt arzandaýy yqpal etti», - delingen Syrtqy ister mınıstrliginiń resmı xabarlamasynda.
Aıta keteıik, búginde Qazaqstan Eýropa elderine munaı-gaz, metall men aýyl sharýashylyǵy ónimderin tasymaldasa, ol jaqtan kólikter, qural-jabdyqtar men san alýan texnıkalar jetkiziledi.
