Qazaqstan men Eýropalyq odaq vızalyq rejımdi jeńildetýdi talqylady
ASTANA. KAZINFORM – 29 mamyrda Qazaqstan-Eýropalyq odaq Saıası konfıgýratsııadaǵy yntymaqtastyq komıtetiniń 23-otyrysy ótti.
QR Syrtqy ister mınıstrliginiń resmı ókili Erlan Jetibaevtyń aıtýynsha, kezdesýde Global Gateway bastamasyn iske asyrý jáne saýda-ekonomıkalyq yntymaqtastyq máselelerine basa mán berilgen.
Qazaqstan tarapynan Syrtqy ister mınıstriniń orynbasary Arman Isetov jáne Eýropalyq syrtqy áreket qyzmetiniń Shyǵys Eýropa men Ortalyq Azııa jónindegi basqarýshy dırektorynyń orynbasary Odrone Perkaýskene qatysqan.
– Qazaqstan men Eýropalyq odaq kólik-logıstıkalyq baılanysty nyǵaıtý, jasyl energetıkany damytý, qorshaǵan ortany qorǵaý, asa mańyzdy shıkizat materıaldaryn jetkizý jáne Qazaqstannyń eksporttyq áleýetin keńeıtý sııaqty salalardaǵy seriktestikti odan ári kúsheıtýdiń strategııalyq baǵdaryn aıqyndady, – dedi E.Jetibaev Astanada ótken aptalyq brıfıngide.
Kún tártibiniń jeke tarmaǵy retinde Qazaqstan azamattary úshin vızalyq rejımdi jeńildetý perspektıvalary qarastyryldy.
– Taraptar konsýldyq-vızalyq saladaǵy dıalogty jandandyrýdyń jáne ózara is-qımyldy ilgeriletýdiń mańyzdylyǵyn atap ótti. Otyrys qorytyndysy boıynsha taraptar Qazaqstan men EO arasyndaǵy seriktestikti ekijaqty ózara is-qımyldyń barlyq baǵyty boıynsha nyǵaıta túsýge ózara múdde baryn rastady, – dedi Erlan Jetibaev.
Buǵan deıin QR SІM Shengen aımaǵy elderinde avtomattandyrylǵan kirý-shyǵý júıesiniń (EES — Entry/Exit System) engizilgenin habarlaǵan edi. Shengen aýmaǵyna alǵash ret kirgende shetel azamattarynan jol júrý qujattarynyń derekteri, bıometrııalyq málimetter, kirý jáne shyǵý kúni men orny mindetti túrde tirkeledi.
