Qazaqstan men Eýropalyq odaq óńirlik dıalogty nyǵaıtýdyń negizgi rólin rastady
ASTANA. KAZINFORM — Qazaqstan Respýblıkasynyń Syrtqy ister mınıstri Ermek Kósherbaev Eýropalyq odaqtyń Ortalyq Azııa jónindegi Arnaýly ókili Edýards Stıpraısty qabyldady. Bul týraly Syrtqy ister mınıstrliginiń baspasóz qyzmeti habarlady.
Kezdesý barysynda Mınıstr Qazaqstan men Eýroodaq arasyndaǵy Keńeıtilgen seriktestik pen yntymaqtastyq týraly kelisimniń on jyl buryn qabyldanyp, uzaq merzimdi ózara is-qımyldyń berik negizine aınalǵanyn jáne ekijaqty saıası dıalogtyń qomaqty túrde nyǵaıyp kele jatqanyn atap ótti.
Taraptar yntymaqtastyqtyń negizgi baǵyttary jóninde pikir almasyp, «jasyl» transformatsııa men kólik baılanystyǵyn ilgeriletý jobalarynyń mańyzdylyǵyna nazar aýdardy. Bul turǵyda Transkaspıı halyqaralyq kólik baǵytyn damytýdyń mańyzdylyǵy rastaldy.
Syrtqy saıası vedomstvo basshysy Qazaqstannyń Eýropalyq odaq úshin senimdi ári jaýapty seriktes ekenin jáne ekijaqty ekonomıkalyq pen saıası ózara is-qımyldy keńeıtýge ashyqtyǵyn atap ótti.
«E.Kósherbaev óńirlik dıalogty ilgeriletý jáne praktıkalyq bastamalardy iske asyrý úshin tıimdi platforma retinde tanytqan «Ortalyq Azııa — Eýropalyq odaq» formaty sheńberinde kooperatsııany odan ári damytýdyń mańyzdylyǵyn aıtty. Birlesken jobalarǵa odan ári belsendi qatysýǵa jáne EO-men ózara is-qımyldyń negizgi baǵyttary boıynsha qatynastardy nyǵaıtýǵa daıyndyq bildirildi», delingen mınıstrlik habarlamasynda.
Óz kezeginde E.Stıpraıs Qazaqstan men Eýroodaq arasyndaǵy ózara is-qımyl deńgeıin joǵary baǵalap, óńiraralyq yntymaqtastyqty nyǵaıtýǵa jáne mańyzdy ekonomıkalyq ári ınfraqurylymdyq bastamalardy damytýǵa qosqan Qazaqstannyń úlesin atap ótti.
Kezdesý qorytyndysy boıynsha suhbattastar ózara tıimdi seriktestikti odan ári tereńdetýge beıildiligin rastap, ekijaqty jáne óńirlik kún tártibindegi negizgi máseleler boıynsha syndarly dıalogty jalǵastyrýǵa daıyn ekenin bildirdi.
Eske sala ketsek, 2 jeltoqsanda Shveıtsarııa tarapynyń shaqyrýymen Syrtqy ister mınıstri Ermek Kósherbaev Shveıtsarııa Konfederatsııasyna resmı saparmen barady.
Sondaı-aq mınıstrliktiń resmı ókili Aıbek Smadııarov Eýropaǵa vıza talabyn jeńildetý jumysy kún saıyn júrip jatqanyn jetkizdi.