Qazaqstan men Eýropa Odaǵy arasyndaǵy vıza máseleleri qaralady - SІM

ASTANA. QazAqparat – QR Bas prokýrorynyń orynbasary Bolat Dembaev «Qazaqstan Respýblıkasy – Eýropalyq odaq» Adam quqyqtary jónindegi dıalogtyń 14-shi otyrysyna qatysady. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«2023 jylǵy 9-10 naýryzda Brıýssel qalasynda Qazaqstan Bas prokýrorynyń orynbasary Bolat Dembaev bastaǵan delegatsııa «Qazaqstan Respýblıkasy – Eýropalyq odaq» Adam quqyqtary jónindegi dıalogtyń 14-shi otyrysyna jáne Sot tóreligi men quqyqtyq tártip máseleleri jónindegi kishi komıtettiń 20-shy otyrysyna qatysady», - dedi A. Smadııarov vedomstvoda ótken aptalyq brıfıngide.

Osy oraıda ol Adam quqyqtary jónindegi dıalog aıasynda azamattyq qoǵamdy qorǵaýdyń ulttyq ınstıtýttaryn damytý máseleleri boıynsha pikir almasý bolatynyn aıtty.

«Sot tóreligi men quqyqtyq tártip máseleleri jónindegi kishi komıtettiń otyrysy barysynda zań ústemdigin nyǵaıtý, sot júıesin basqarý jáne reformalaý, sybaılas jemqorlyqqa qarsy kúres, kóshi-qon, shekarany basqarý, sondaı-aq Qazaqstan men Eýropa Odaǵy arasyndaǵy vıza máseleleri, adam saýdasyna jáne zańsyz kóshi-qonǵa qarsy kúres taqyryptaryn jan-jaqty talqylaý eskerilgen», - dedi resmı ókil.