Qazaqstan men Eýropa Odaǵy BUU Jarǵysyn saqtaýǵa árdaıym beıil ekenin taǵy da rastady

ASTANA. KAZINFORM — Búgingi kezdesý seriktestiktiń jańa kezeńge qadam basyp, strategııalyq mańyzǵa ıe bola bastaǵanyn aıǵaqtady, dep habarlaıdy Aqordanyń baspasóz qyzmeti.

Qazaqstan men Eýropa Odaǵy BUU Jarǵysyn jáne halyqaralyq quqyq normalaryn saqtaýǵa árdaıym beıil ekenin taǵy da rastady. Qasym-Jomart Toqaev «Ortalyq Azııa — Eýropa Odaǵy» dıalog platformasy óńirdegi mańyzdy mindetterdi sheshýde tıimdi quralǵa aınalǵanyn aıtty.

— Óńirler arasyndaǵy yntymaqtastyqty damytý máselesine basa mán berildi. Bul oraıda «Ortalyq Azııa — Eýropa Odaǵy» dıalog platformasy ózara baılanys, saýda, kólik, ekologııalyq taza energııa, sý resýrstaryn basqarý jáne tsıfrlyq transformatsııa salalarynda óńirdegi mańyzdy mindetterdi sheshýde tıimdi quralǵa aınaldy dep sanaımyz. Búgingi kezdesý seriktestigimiz jańa kezeńge qadam basyp, strategııalyq mańyzǵa ıe bola bastaǵanyn aıǵaqtady. Ózara yntymaqtastyǵymyzdyń qarqyny joǵary, keleshegi zor. Qol jetkizilgen ýaǵdalastyqtar kóp uzamaı naqty jobalar men bastamalarǵa ulasady dep senemin, — dedi Memleket basshysy.

Osyǵan deıin Prezıdent elimizge udaıy qoldaý kórsetip kele jatqan Eýropa Odaǵyna rızashylyǵyn bildirdi.

Óz kezeginde Antonıý Koshta Qazaqstannyń óńirlik turaqtylyqty qamtamasyz etýdegi belsendi áreketin quptaıtynyn jetkizdi.