Qazaqstan men Eýropa elderindegi benzın baǵasy salystyrýǵa kelmeıdi - Qanat Bozymbaev

ASTANA. QazAqparat - Benzınniń tómen baǵasyn qalaıtyn bolsaq, onda janarmaı shekteýli bolatyndyǵyn esten shyǵarmaýymyz qajet. Búgin halyqpen esepti kezdesýin ótkizip jatqan QR Energetıka mınıstri Qanat Bozymbaev osylaı dedi, dep habarlaıdy QazAqparat tilshisi.

Qanat Bozymbaev óz sózinde Energetıka mınıstrliginiń basty mindeti janarmaı tapshylyǵyn boldyrmaý jáne naryqty otymen qamtamasyz etý ekendigin basa aıtty.

«Barlyǵymyz da naryqtyq ekonomııkada ómir súrip jatyrmyz. Qazaqstan 5 memleketpen shektesedi. Túrkimenstandy qospaǵanda qalǵan tórteýiniń janarmaı quıý beketterindegi baǵa bizden birshama joǵary. Eger de biz tómen baǵany qalaıtyn bolsaq, onda bul jaǵdaıda janarmaı shekteýli bolatyndyǵyn túsinýimiz qajet. Men Eýropa elderdegi janarmaı baǵasy men Qazaqstandaǵy baǵany salystyrmaımyn da. Óıtkeni elder arasynda kiris deńgeıiniń aıyrmashylyǵy joǵary ekendigin túsinemin», - dedi ol.

Degenmen, mınıstr Qazaqstandaǵy janarmaı baǵasy TMD elderimen salystyrǵanda eń tómen kórsetkish ekendigine nyq senimmen aıtatyndyǵyn atap ótti.

«Mınıstrlik tarabynan baǵa qurylymdaýdyń barynsha taza bolýyna qol jetkizýge jáne ishki naryqqa munaı jetkizýdiń ekonomıkalyq rentabeldi jaǵdaıyn jasaýǵa tyrysatyndyǵymyzdy basa aıtqym keledi. Ol úshin munaı ónimderiniń bırjalyq saýda-sattyǵy syndy birqatar tetikterdi qarastyrýdamyz jáne salyq saıasatyna bolashaqta ózgertýler engizbekpiz», - dedi Q. Bozymbaev.