Qazaqstan men Eýroodaq quqyqtyq salada birlesip áreket etý týraly hattamaǵa qol qoıdy

ASTANA. QazAqparat - Bıylǵy 9-10 naýryzda Brıýsselde «Qazaqstan Respýblıkasy - Eýropalyq Odaq» sot tóreligi jáne quqyqtyq tártip jónindegi Kishi komıtettiń jáne adam quqyqtary jónindegi dıalogtyń otyrystary ótti, dep habarlaıdy QazAqparat QR Bas prokýratýrasynyń baspasóz qyzmetine sileteme jasap.

Qazaqstandyq delegatsııadan Bas prokýratýranyń, Joǵarǵy sottyń, Sybaılas jemqorlyqqa qarsy is-qımyl agenttiginiń, Ulttyq qaýipsizdik komıtetiniń, Adam quqyqtary jónindegi ulttyq ortalyqtyń, syrtqy ister, aqparat jáne qoǵamdyq damý, eńbek jáne halyqty áleýmettik qorǵaý, sondaı-aq ádilet mınıstrlikteriniń ókilderi qatysty.

Osy is-sharalardyń teń tóraǵasy bolyp tabylatyn QR Bas prokýrorynyń orynbasary Bolat Dembaev olardyń erekshe mańyzdylyǵyn atap ótti, óıtkeni Qazaqstan Respýblıkasynyń Konstıtýtsııasyna sáıkes adamnyń ómiri, onyń quqyqtary men bostandyqtary basty qundylyqtar bolyp tabylady.

Taraptar azaptaýlardyń aldyn alý, zańsyz kóshi-qonǵa, terrorızmge, esirtki qylmysyna, kóleńkeli ekonomıkaǵa jáne sybaılas jemqorlyqqa qarsy kúres, sot-quqyqtyq reforma, Qazaqstannyń qylmystyq sot isin júrgizý salasyndaǵy eýropalyq konventsııalarǵa qosylý bastamasy týraly máselelerin talqylady.

Sonymen qatar, azamattyq qoǵamdy damytý, áıelder men balalardyń quqyqtaryn qorǵaý, sóz jáne din bostandyǵy týraly pikir almasty.

«Atalǵan otyrystardyń sońynda taraptar birlesken qyzmettiń odan ári qadamdaryn belgilep, tıisti Hattamaǵa qol qoıdy»,-delingen Bas prokýratýranyń baspasóz qyzmeti tartqan habarlamada.