Qazaqstan men Eýroodaq kedendik retteý jáne tsıfrlandyrý máselelerin qarastyrdy
ASTANA. KAZINFORM — Sársenbi, 15 sáýir kúni Brıýssel qalasynda Eýropalyq komıssııada Qazaqstan–EO Kedendik kishi komıtetiniń otyrysy ótti, dep habarlaıdy Kazinform agenttiginiń Belgııadaǵy menshikti tilshisi.
Іs-shara ekijaqty yntymaqtastyqty nyǵaıtýǵa, dıalogty damytýǵa jáne kedendik retteý, ózara is-qımyl men saýdany tsıfrlandyrý salalarynda úzdik tájirıbelermen almasýǵa baǵyttaldy.
Otyrys barysynda Eýropalyq odaq pen Qazaqstan ókilderi ózara qyzyǵýshylyq týdyratyn keń aýqymdy máselelerdi qarastyrdy.
Atap aıtqanda, Eýropalyq odaq keden zańnamasyn reformalaý barysy týraly ózekti aqparat usyndy. Onyń ishinde EO-nyń jańa Keden kodeksiniń erejeleri, EO Keden organyn qurý bastamasy, sondaı-aq elektrondy kommertsııany retteý máseleleri qamtyldy.
Qazaqstan tarapynyń suraýy boıynsha ýákiletti ekonomıkalyq operatorlar baǵdarlamasyn iske asyrý tájirıbesi men ony odan ári damytý perspektıvalary da tanystyryldy.
Óz kezeginde Qazaqstan Respýblıkasy ulttyq keden zańnamasy men ákimshilik rásimderdegi sońǵy ózgeristerge sholý jasady.
Taraptar saýdany jeńildetýge baǵyttalǵan qazirgi tsıfrlyq bastamalardy talqylady. Onyń ishinde taýardyń shyǵý tegi sertıfıkattary sııaqty elektrondy qujattardy ózara taný perspektıvalary qarastyryldy.
Sondaı-aq otyrys aıasynda shekarada zııatkerlik menshik quqyqtaryn qorǵaý, quqyq ıelerimen ózara is-qımyl jáne osy saladaǵy praktıkalyq máselelerdi sheshý boıynsha tájirıbe almasý ótti.
Taraptar baılanys tulǵalarynyń tizimin jańartyp, ózara ákimshilik kómek kórsetýge qatysty suraýlardyń oryndalý barysyn, sonyń ishinde jaýap berý jedeldigin talqylady.
Budan bólek, tıisti Hattamanyń 3-babynyń erejelerin qoldaný, atap aıtqanda ekonomıkalyq operatorlardy tekserý máselelerine erekshe nazar aýdaryldy.
Eýropalyq odaq EO men Ortalyq Azııa elderi arasyndaǵy kólik jáne logıstıkalyq baılanystardy damytý bastamalaryn tanystyrdy. Atap aıtqanda, 2026 jyldyń qyrkúıeginde Polshada ótetin taqyryptyq semınardy qosa alǵanda, birlesken is-sharalardy ótkizý josparlary aıtyldy.
Otyrys qorytyndysy boıynsha taraptar yntymaqtastyqtyń aldaǵy baǵyttaryn aıqyndap, Kishi komıtettiń kelesi otyrysynyń ótetin kúni men ornyn kelisti.
Eýropalyq komıssııanyń salyq salý jáne kedendik retteý dırektoraty departamentiniń basshysy Matıas Petshke:
— Biz kedendik yntymaqtastyq komıtetiniń otyrysyn ótkizip jatyrmyz. Bul EO men Qazaqstan tarapynan keden qyzmetteriniń ókilderi ekijaqty saýdany ilgeriletý, kedendik rásimderdi jeńildetý jáne yntymaqtastyqty keńeıtý múmkindikterin talqylap jatqanyn bildiredi.
Búgingi kezdesý bizge eki taraptaǵy zańnamalyq jaǵdaı boıynsha ózekti aqparatpen almasýǵa múmkindik beredi. Sondaı-aq bul yntymaqtastyqty tereńdetýge qajetti baǵyttardy aıqyndaýǵa kómektesedi.
Sońǵy jyldary tájirıbe almasý men saýdany damytý turǵysynan óte tabysty ózara is-qımyldyń qorytyndysyn jasadyq. Biz durys baǵytta ilgerilep kelemiz, jáne bul kezdesý osy baǵyttaǵy progresti odan ári jedeldetýge múmkindik beredi.
Qazaqstan Eýropalyq odaq úshin Ortalyq Azııadaǵy negizgi seriktesterdiń biri bolyp tabylady jáne bul atalǵan kezdesýde taǵy da rastaldy. Qazaqstandyq tarap Brıýsselge sapary aıasynda Chehııa men Belgııanyń ulttyq keden qyzmetterine de bardy. EO deńgeıinde ǵana emes, jekelegen múshe memleketterdiń kedendik ákimshilikterimen de mańyzdy ekijaqty kezdesýler ótti.
