Qazaqstan men Eýroodaq arasyndaǵy áriptestiktiń Eýrazııadaǵy mańyzy arta tústi — sarapshy
ASTANA. KAZINFORM – Eýropalyq ekonomıkalyq jáne áleýmettik komıtet (EEÁK) naýryz aıyndaǵy plenarlyq otyrysynda Eýroodaq pen Qazaqstandaǵy azamattyq qoǵam uıymdary arasyndaǵy yntymaqtastyqty nyǵaıtý jónindegi is-qımyl josparyn qabyldady. Bul týraly Kazinform agenttiginiń menshikti tilshisi habarlaıdy.
Qazaqstan men Eýroodaq arasynda qol qoıylǵan keńeıtilgen áriptestik jáne yntymaqtastyq týraly kelisim (EPCA) saýda, ınvestıtsııa, energetıka, aýyl sharýashylyǵy jáne baılanys sııaqty negizgi salalardaǵy yntymaqtastyqtyń tereńdeýine yqpal etti.
— Tsıfrlardyń ózi aıtyp tur, Qazaqstan EO-ǵa ımporttalatyn fosfordyń 71% jáne tıtannyń 36% jetkizedi, bul eldi Eýropanyń ónerkásiptik saıasatynyń negizgi elementi retinde kórsetedi. Sondaı-aq, Qazaqstanda Eýropalyq komıssııanyń mańyzdy shıkizattar týraly zańynda kórsetilgen 34 elementtiń 33-i bar. Olardyń 19-y qazir óndirilýde, al qalǵan 14 elementtiń óndirisi aldaǵy ýaqytta josparlanǵan, — dep atap ótti eýropalyq tarap.
Soǵan qaramastan, EEÁK EPCA kelisimin jáne EO-nyń «Jahandyq shlıýz» (Global Gateway) strategııasyn Qazaqstan men Ortalyq Azııada júzege asyrý azamattyq qoǵam uıymdarynyń qatysýynsyz múmkin emes dep esepteıdi.
— Uly derjavalar arasyndaǵy básekelestik kúsheıip, jahandyq jetkizý tizbekteri qaıta qurylyp jatqan, al Eýroodaq ekonomıkalyq turaqtylyqty strategııalyq maqsat etip qoıǵan kezeńde Qazaqstan men EO arasyndaǵy mańyzdy shıkizat resýrstary (CRMS) boıynsha áriptestik Eýrazııadaǵy geosaıası ekonomıkalyq saıasattyń mańyzdy quramdas bóligine aınalýda, — dedi EEÁK múshesi, Qazaqstan boıynsha negizgi baıandamashy Dýmıtrý Fornea.
Dýmıtrý Fornea EO men Qazaqstan arasyndaǵy shıkizat salasyndaǵy strategııalyq áriptestik týraly ózara túsinistik jónindegi memorandýmdy ilgeriletýde azamattyq qoǵamnyń qatysýynyń mańyzdylyǵyn atap ótti.
Qorytyndylaı kele, EO men Qazaqstandaǵy uıymdasqan azamattyq qoǵam arasyndaǵy qatynastar birneshe basymdyqqa negizdelgen is-qımyl jospary men EO-nyń Ortalyq Azııaǵa arnalǵan jańa strategııasynyń maqsattaryna sáıkes damýy múmkin ekendigin aıtyp otyr.
Birinshi Eýroodaq — Ortalyq Azııa sammıtinde ne talqylanatynyn siltemege ótip oqýǵa bolady.