Qazaqstan men Estonııa qaı salalarda yntymaqtastyqty nyǵaıtady
ASTANA. KAZINFORM — Qazaq-eston bıznes-forýmynda jalpy quny 517 mln AQSh dollarynan asatyn kelisimder bekitildi. Sonyń ishinde mal sharýashylyǵy salasyndaǵy yntymaqtastyq memorandýmy jasaldy, dep habarlaıdy AShM baspasóz qyzmeti.
Qazaqstan Prezıdenti Qasym-Jomart Toqaev pen Estonııa Prezıdenti Alar Karıs qatysqan qazaq-eston bıznes-forýmy aıasynda QR Aýyl sharýashylyǵy mınıstrligi men Estonııa Respýblıkasynyń Óńirlik ister jáne aýyl sharýashylyǵy mınıstrligi mal sharýashylyǵy salasyndaǵy ózara túsinistik týraly memorandýmǵa qol qoıdy.
— Memleket basshysy Qasym-Jomart Toqaev óz sózinde forýmnyń saýda-ekonomıkalyq baılanystardy nyǵaıtýǵa jáne agroónerkásiptik keshen salasyndaǵy áriptestikti damytý úshin jańa múmkindikter ashýǵa yqpal etetinin atap ótti. Prezıdent Estonııa bıznesiniń Qazaqstandaǵy qatysýyn keńeıtýdiń mańyzyn kórsetip, yntymaqtastyqtyń kólik jáne logıstıka, tsıfrlandyrý, ónerkásip, aýyl sharýashylyǵy, qarjy jáne bilim berý sııaqty perspektıvaly baǵyttaryn aıqyndady, — delingen mınıstrlik taratqan aqparatta.
Óz kezeginde Estonııa Prezıdenti Alar Karıs te agrarlyq saladaǵy ózara is-qımyldy tereńdetýge jáne ozyq tájirıbemen almasýǵa qyzyǵýshylyq bildirdi.
Qol qoıylǵan Memorandýmda:
- sút jáne et baǵytyndaǵy mal sharýashylyǵyn damytý;
- genetıkalyq jetildirý, selektsııalyq jumys, fenotıpteý jáne tsıfrlyq sheshimder boıynsha tájirıbe almasý;
- veterınarııalyq-sanıtarııalyq qaýipsizdik, janýarlar ál-aýqaty jáne bıoqorǵaý salalaryndaǵy yntymaqtastyq;
- ǵylymı-tehnıkalyq jobalardy, birlesken semınarlar men zertteý bastamalaryn ilgeriletý;
- eki eldiń salalyq qaýymdastyqtary, ǵylymı ortalyqtary jáne sarapshylar qaýymdastyǵy arasyndaǵy baılanystardy nyǵaıtý kózdelgen.
Іs-shara qorytyndysy boıynsha Qazaqstan men Estonııa kompanııalary arasynda jalpy quny 517 mln AQSh dollarynan asatyn 11 kommertsııalyq kelisimge qol qoıyldy. Bul eki el bıznesiniń áriptestikti keńeıtýge joǵary qyzyǵýshylyq tanytyp otyrǵanyn kórsetedi.