Qazaqstan men Estonııa agroónerkásip salasyndaǵy yntymaqtastyqty keńeıtedi
ASTANA. KAZINFORM — Aýyl sharýashylyǵy vıtse-mınıstri Ermek Kenjehanuly bastaǵan delegatsııa jumys saparymen Estonııa Respýblıkasyna bardy, dep habarlaıdy AShM baspasóz qyzmeti.
Delegatsııa quramyna oblys ákimderiniń orynbasarlary, sondaı-aq otandyq agrarlyq jáne eksportqa baǵyttalǵan kompanııalardyń ókilderi kirdi.
Jumys sapary Memleket basshysynyń Estonııamen saýda-ekonomıkalyq yntymaqtastyqty damytý jáne otandyq aýyl sharýashylyǵy ónimderiniń eksporttyq múmkindikterin keńeıtý jónindegi tapsyrmalaryn iske asyrý aıasynda uıymdastyryldy.
Delegatsııa músheleri Estonııanyń porttyq ınfraqurylymymen, onyń ishinde Tallın jáne Sıllamıae porttarymen, sondaı-aq astyq termınaldarymen tanysty. Estonııa bıznesi men logıstıkalyq kompanııalarynyń ókilderimen kelissózder júrgizildi.
Kelissózder barysynda Baltyq baǵytyn Qazaqstan astyǵy men maıly daqyldaryn Soltústik Eýropa, Taıaý Shyǵys jáne Soltústik Afrıka naryqtaryna eksporttaýdyń negizgi baǵyttarynyń biri retinde paıdalaný perspektıvalaryna erekshe nazar aýdaryldy.
Mýýga portynyń basshylyǵymen ótken kezdesýde taraptar turaqty ári boljamdy eksporttyq marshrýttardy qalyptastyrý máselelerin talqylady.
— Qazaqstan úshin Mýýga porty turaqty eksporttyq marshrýttardy qalyptastyrýdaǵy mańyzdy býyn. Biz atalǵan kólik dálizin júıeli túrde damytýǵa jáne qazaqstandyq agrarlyq ónimderdi jetkizý úshin boljamdy jaǵdaılar jasaýǵa múddelimiz. Memlekettik qoldaý sharalarynyń arqasynda 2025 jyly Baltyq elderiniń porttary arqyly astyq eksporty alty eseden astam ósip, 802 myń tonnaǵa jetti. Bul eksport baǵyttaryn ártaraptandyrý boıynsha qabyldanyp jatqan sharalardyń tıimdiligin rastaıdy, — dep atap ótti Ermek Kenjehanuly.
Estonııa jáne skandınavııalyq treıderlermen ótken kelissózderdiń negizgi taqyryptary ózara saýda kólemin ulǵaıtý, turaqty logıstıkalyq tizbekterdi damytý jáne uzaq merzimdi kelisimsharttar jasaý boldy.
Kezdesýlerdiń jeke blogy mal sharýashylyǵy salasyndaǵy yntymaqtastyqqa arnaldy. Estonııanyń Aýyl sharýashylyǵy mınıstrligi men Estonııanyń asyl tuqymdy iri qara mal qaýymdastyǵy ókilderimen ótken kezdesýde buryn qol jetkizilgen kelisimderdi iske asyrý máseleleri talqylandy. Atap aıtqanda, genetıka jáne selektsııa salasyndaǵy tájirıbe almasý, veterınarııalyq tehnologııalardy damytý, Qazaqstanǵa asyl tuqymdy mal ımporttaý perspektıvalary qarastyryldy.
Taraptar agroónerkásip salasyndaǵy áriptestikti odan ári keńeıtýge, logıstıkalyq baǵyttardy damytýǵa, birlesken ınvestıtsııalyq jobalardy iske asyrýǵa, AÓK-ti tsıfrlandyrýǵa jáne Qazaqstan men Estonııa arasyndaǵy saýda-ekonomıkalyq baılanystardy nyǵaıtýǵa ózara múddeliligin rastady.
Osyǵan deıin qazaqstandyq maı óndirýshiler Estonııaǵa 5 mln dollar kóleminde ónim jetkizetinin jazǵanbyz.