Qazaqstan men EO vızany jeńildetý jónindegi resmı kelissózderdi bastady
ASTANA. KAZINFORM — Qazaqstan Respýblıkasy men Eýropalyq odaq arasyndaǵy vızalyq rejımdi jeńildetý týraly kelisim jáne Readmıssııa týraly kelisim boıynsha alǵashqy resmı kelissózder raýndy ótti, dep habarlaıdy QR Syrtqy ister mınıstrliginiń baspasóz qyzmeti.
Otyrysty QR Syrtqy ister mınıstriniń orynbasary Álibek Baqaev pen Eýropalyq komıssııanyń Mıgratsııa jáne ishki ister jónindegi bas dırektoraty bas dırektorynyń orynbasary Iohannes Lýhner teń tóraǵalyq etti.
Kelissózderdiń bastalýy sımvoldyq ári mańyzdy oqıǵa boldy. Jeltoqsan aıynda Qazaqstan men EO arasyndaǵy Keńeıtilgen seriktestik pen yntymaqtastyq týraly kelisimge qol qoıylǵanyna 10 jyl tolady. Jańa kelissózder treginiń iske qosylýy on jyl boıy júıeli túrde damyp kele jatqan qatynastardyń jetilgenin, mazmundylyǵyn jáne strategııalyq baǵyttylyǵyn kórsetedi.
Taraptar kelissózderdiń ashylýy senim deńgeıiniń artýyn, azamattar úshin múmkindikterdi keńeıtýge, gýmanıtarlyq jáne qoǵamdyq baılanystardy nyǵaıtýǵa degen ortaq umtylysty aıqyn kórsetetinin atap ótti. Sonymen qatar bul kelissózder Eýropalyq odaq pen Ortalyq Azııa memleketi arasyndaǵy alǵashqy protsess ekeni jáne osy qadamǵa tarıhı mán beretindigi erekshe atalyp ótti.
— Talqylaý konstrýktıvti jáne iskerlik jaǵdaıda ótti. Taraptar óz kózqarastarymen almasyp, bastapqy baǵdarlardy kelisip, aldaǵy jumystyń negizgi baǵyttaryn aıqyndady. Kelissózder eki taraptyń da alǵa dáıekti túrde ilgerileýge jáne saparlardy jeńildetýge, adamdar arasyndaǵy baılanystardy nyǵaıtýǵa, yntymaqtastyqty keńeıtýge yqpal etetin zamanaýı quqyqtyq baza qalyptastyrýǵa daıyn ekenin kórsetti, — delingen habarlamada.
QR Syrtqy ister mınıstri Ermek Kósherbaev pen EO Syrtqy saıasat jáne qaýipsizdik saıasaty jónindegi joǵary ókili Kaıa Kallastyń tóraǵalyǵymen 1 jeltoqsanda Brıýsselde ótken Qazaqstan-Eýroodaq yntymaqtastyq keńesiniń 22-shi otyrysy kezinde resmı kelissózderdiń bastalǵany týraly jarııalandy.
Qazaqstan men Eýropalyq odaq kelissózderdi jalǵastyrýǵa jáne kelesi raýndty 2026 jyly Astanada ótkizýge ýaǵdalasty.
Budan buryn Qazaqstan men Eýropalyq odaq óńirlik dıalogty nyǵaıtýdyń negizgi rólin rastaǵan edi.