Qazaqstan men EO seriktestigi ınnovatsııalyq kóshbasshylyqtyń úzdik úlgisine aınalady — Bektenov
ASTANA. KAZINFORM — Premer-mınıstr Oljas Bektenov sý resýrstary men qaldyqtardy basqarý máselelerine arnalǵan «Qazaqstan — Eýroodaq» dıalogtik platformasynyń 17-shi otyrysyn ótkizdi. Bul týraly Úkimettiń baspasóz qyzmeti habarlady.
Sý qaýipsizdigin qamtamasyz etý, transshekaralyq yntymaqtastyqty damytý, sý paıdalaný tıimdiligin arttyrý jáne tsırkýlıarly ekonomıkaǵa kóshý sharalary talqylandy. Sonymen qatar Qazaqstannyń EO-men ekologııalyq tehnologııalar engizý, ınvestıtsııalar tartý jáne ozyq tájirıbeler almasý salasyndaǵy áriptestiginiń keleshegi qaraldy.
Premer-mınıstr óz sózinde elimizdiń sý balansyna júktemeniń kúsheıýi jaǵdaıynda sý resýrstaryn utymdy ári ornyqty basqarýdyń mańyzdylyǵyn atap ótti. Qazaqstan Úkimetiniń aldynda turǵan mindetterdi eskere otyryp, onyń ishinde sý sharýashylyǵy ınfraqurylymyn jańǵyrtý jáne sý paıdalanýdyń tıimdiligin arttyrý, ásirese, aýyl sharýashylyǵynda Sý resýrstaryn basqarý júıesin damytý tujyrymdamasy iske asyrylýda. Qazaqstan men Eýropalyq Odaq arasyndaǵy transshekaralyq yntymaqtastyq aıasynda júzege asyrylyp jatqan birqatar bastama oń baǵalandy. Osylaısha, Sustainable Energy Connectivity in Central Asia (SECCA) aıasynda turaqty sý paıdalaný jáne energııa tıimdiligin arttyrý salasyndaǵy pılottyq jobalar iske qosyldy. Team Europe Initiative on Water, Energy and Climate Change óńirlik baǵdarlamasy Qazaqstannyń sý sektoryna jeke ınvestıtsııa tartý quraly retinde qyzmet etedi.
Qaldyqtardy basqarý máselesine nazar aýdaryldy. Sońǵy 10 jylda Qazaqstanda qaldyqtardy qaıta óńdeý úlesi 1%-dan 25%-ǵa deıin ósti. 2030 jylǵa qaraı bul kórsetkishti 40%-ǵa deıin jetkizý josparlanýda. Óndirýshi jaýapkershiliginiń keńeıtilgen júıesin engizýdiń, qaldyqtardy energetıkalyq kádege jaratý ınfraqurylymy men tehnologııalaryn damytýdyń róli erekshe atap ótildi.
Premer-mınıstr Qazaqstan men Eýropalyq Odaq arasyndaǵy áriptestikti nyǵaıtý ekologııalyq ınnovatsııalardy engizý, ınfraqurylymdyq jobalardy birlesip júzege asyrý jáne «jasyl» kún tártibin ilgeriletý úshin jańa múmkindikter ashatynyna toqtaldy.
— Prezıdent Qasym-Jomart Toqaev sý resýrstaryn ornyqty basqarý jáne halyqaralyq seriktestermen, atap aıtqanda, Eýropalyq Odaqpen dıalogti damytý máselelerine úlken mán beredi. Búgingi kezdesý — bul jaı ǵana pikir almasý emes, sýdy uqypty ári ádil paıdalanatyn bolashaqty birlesip qalyptastyrýǵa arnalǵan platforma, qaldyqtar qundylyq pen jańa energııanyń qaınar kózine aınalady, al Qazaqstan men EO seriktestigi óńirdegi «jasyl» damý men ınnovatsııalyq kóshbasshylyqtyń úzdik úlgisine aınalady. Múddeli taraptardy naqty jobalardy júzege asyrý, tehnologııalardy engizý jáne ekologııalyq minez-qulyqty transformatsııalaý úshin kúsh biriktirýge shaqyramyn. Qazaqstan Úkimeti bul máselelerde senimdi seriktes bolýǵa daıyn, — dep atap ótti Oljas Bektenov.
Aıta keteıik búgin Úkimette elde elektromobıl shyǵarý jospary talqylanǵan edi.