Qazaqstan men EO kólik dálizin tsıfrlandyrýdy kúsheıtpek
ASTANA. KAZINFORM — Astanada Qazaqstan Respýblıkasy Kólik vıtse-mınıstri Jánibek Taıjanov pen Eýropalyq Komıssııanyń Halyqaralyq áriptestik jónindegi Bas dırektsııasynyń Turaqty kólik jáne qala qurylysy bóliminiń basshysy Serhıo Olete Hosanyń ekijaqty kezdesýi ótti. Bul týraly vedomstvonyń baspasóz qyzmeti málim etti.
Kelissózder barysynda taraptar Transkaspıı halyqaralyq kólik baǵytynyń qazirgi jaǵdaıy men negizgi jetistikterin talqylady. Tranzıttik tasymaldar ósiminiń oń dınamıkasy, júkterdi jetkizý merzimderiniń aıtarlyqtaı qysqarǵany, konteınerlik tasymal kólemin odan ári arttyrý josparlary atap ótildi.
— Kaspıı aımaǵyndaǵy port ınfraqurylymyn damytýǵa erekshe nazar aýdaryldy. Qazaqstandyq tarap EQDB jáne EO qarjylyq qoldaýymen júzege asyrylyp jatqan Aqtaý teńiz portyndaǵy aılaqtardy qaıta jańartý, sondaı-aq jańa kemeler salý jáne Kaspıı teńizinde paromdyq qatynasty damytý barysy týraly baıandady, — delingen habarlamada.
EO men Qazaqstannyń kólik salasyndaǵy yntymaqtastyǵyn talqylaý aıasynda taraptar dáliz ótkizý qabiletin arttyrýǵa jáne óńirlik baılanysty jaqsartýǵa baǵyttalǵan negizgi temirjol jobalarynyń iske asyrý barysyn qarastyrdy.
Taraptar sondaı-aq kólik-logıstıkalyq protsesterdi tsıfrlandyrýdy, onyń ishinde elektrondy qujat aınalymy men kedendik resimdeý platformalaryn damytýdy, sondaı-aq halyqaralyq avtomobıl tasymaldaryna ruqsat berý qujattaryn elektrondy almasýǵa kóshýdi talqylady. Qazaqstan EO elderin osy jobaǵa qosylýǵa shaqyrdy.
Kezdesý qorytyndysy boıynsha taraptar kóliktik áriptestikti odan ári nyǵaıtýǵa ózara múddeli ekendikterin rastady jáne Azııa men Eýropa arasyndaǵy senimdi jáne básekege qabiletti baǵyt retinde Transkaspıı dálizin damytý boıynsha syndarly dıalogty jalǵastyrýǵa daıyn ekendikterin bildirdi.
Aıta keteıik, Transkaspıı baǵyty boıynsha júk tasymaly 5 jylda 3 esege artty.
