Qazaqstan men EO vıza rejımin jeńildetý boıynsha resmı kelissózderdi bastaıdy - Roman Vasılenko
QR Syrtqy ister mınıstriniń orynbasary Roman Vasılenko Qazaqstan men Eýroodaq vızalyq rejımdi jeńildetý boıynsha resmı kelissózderdi bastaıtynyn aıtty, dep habarlaıdy Kazinform agenttigi.
Silk Way telearnasynyń New Time telebaǵdarlamasyna bergen suhbatynda QR Syrtqy ister mınıstriniń orynbasary Roman Vasılenko EO men Qazaqstan arasynda qol qoıylǵan keńeıtilgen áriptestik pen yntymaqtastyq týraly kelisim taraptardyń vızalyq rejımdi jeńildetý jónindegi kelissózderdi qarastyratynyn aıtty.
Ol Qazaqstannyń 2017 jyly Eýroodaqtyń barlyq elderi úshin vızasyz rejım engizgenin eske saldy. Endi Qazaqstan eýropalyq áriptesterden Qazaqstanǵa vızalyq rejımdi joımaı, azamattarǵa vıza berýdi jeńildetýdi surap otyr.
- Osy jyldyń basynda Syrtqy ister mınıstri Murat Nurtileý men Eýropalyq ishki ister komıssııasynyń múshesi, komıssar Ilva Iohanssonnyń kezdesýinde vızalyq máselege járdemdesý boıynsha ýaǵdalastyqqa qol jetkizilgenin habarlaýǵa qýanyshtymyn. Qazir Eýropalyq Odaqpen jáne oǵan múshe memlekettermen keńesý protsesi júrip jatyr. Jáne bul jaqyn arada júzege asady dep úmittenemiz. Men naqty merzimin ataı almaımyn, biraq qazaqstandyqtar úshin bul protsess jeńildeı túsetini anyq, - dedi R.Vasılenko suhbat barysynda.
Alaıda, ol bul atalǵan protsesti júzege asyrýǵa jasalǵan alǵashqy qadam ǵana ekenin atap ótti. Qazaqstan da, EO da talpynyp otyrǵan vızalyq rejımdi jeńildetý týraly kelisim readmıssııa (zańsyz mıgranttardy qaıtarý) týraly kelisimmen qatar júredi. Bul Qazaqstan Eýropalyq Odaq aýmaǵynda zańsyz júrgen azamattardy keri qabyldaýǵa mindetteletinin bildiredi.
- Biz eýropalyq seriktesterimizben ózara qarym-qatynas jasap, olardyń bizben jumys jasap jatqanyna qýanyshtymyz jáne jaqyn arada jaqsy jańalyqtarmen bólisemiz dep úmittenemin», - dep qosty Vasılenko.
