Qazaqstan men EO vıza men readmıssııa boıynsha kelissózderdiń jańa kezeńine ótti
ASTANA. KAZINFORM — Qazaqstan men Eýropalyq odaq delegatsııalary vızalyq talaptardy jeńildetý jáne readmıssııa týraly kelisim jobalary boıynsha kelissózderdiń kezekti kezeńin tabysty ótkizdi, dep habarlaıdy QR SІM baspasóz qyzmeti.
Kelissózder barysynda taraptar bolashaq kelisimderdiń negizgi erejeleri boıynsha ustanymdardy odan ári jaqyndatý máselelerin mazmundy túrde talqylaýdy jalǵastyrdy.
— Qazaqstan Respýblıkasy azamattary úshin vızalyq rásimderdi jetildirý máselelerine erekshe nazar aýdaryldy. Atap aıtqanda, ótinishterdi qaraý merzimderi, kóp mártelik vızalardy berý tártibi, rastaıtyn qujattar tizbesin ońtaılandyrý jáne adamdar arasyndaǵy baılanystardy damytýǵa baǵyttalǵan ózge de praktıkalyq aspektiler qarastyryldy. Kelissózder qorytyndysy boıynsha taraptar eki kelisimniń de kóptegen erejesi boıynsha eleýli ilgerileýge qol jetkizilgenin atap ótip, jumysty jalǵastyrýǵa daıyn ekendikterin rastady, — delingen vedomstvo habarlamasynda.
Mınıstrlik málim etkendeı, qol jetkizilgen nátıjeler ózara túsinistiktiń joǵary deńgeıin kórsetedi jáne azamattardyń utqyrlyǵyn odan ári damytýǵa, sondaı-aq Qazaqstan men Eýropalyq odaq arasyndaǵy iskerlik, bilim berý, ǵylymı jáne gýmanıtarlyq baılanystardy keńeıtýge berik negiz qalaıdy.
Osyǵan deıin Eýroparlamentte Qazaqstannyń reformalary men EO-men seriktestigi talqylanǵanyn jazǵanbyz.
