Qazaqstan men EO strategııalyq áriptestikti odan ári keńeıtpekshi
ASTANA.KAZINFORM - Lıýksembýrgte Ortalyq Azııa memleketteri, Shyǵys áriptestik elderi, Túrkııa jáne Eýropalyq Odaq syrtqy ister mınıstrlikteri ókilderiniń kezdesýi ótti. Kezdesýge Qazaqstan atynan Syrtqy ister mınıstriniń orynbasary Arman Isetov qatysty, dep habarlaıdy Kazinform agenttiginiń menshikti tilshisi.
Qazaqstandyq dıplomat Eýropalyq komıssııanyń vıtse-prezıdenti, Odaqtyń Syrtqy ister jáne qaýipsizdik saıasaty jónindegi Joǵarǵy ókili Kaıa Kallaspen, Halyqaralyq áriptestik jónindegi komıssary ıÝzef Sıkelamen jáne Eýropalyq Odaqtyń Ortalyq Azııa boıynsha arnaıy ókili Edvards Stıpraıspen kezdesti.
Talqylaý barysynda taraptar Qazaqstan men Eýropalyq Odaq arasyndaǵy ózara syılystyq, senim men ortaq múddege negizdelgen kóp qyrly jáne qarqyndy damyp kele jatqan yntymaqtastyq máselelerin talqylady.
Buǵan Qazaqstan Respýblıkasy men Eýropalyq Odaq jáne oǵan múshe memleketter arasyndaǵy Keńeıtilgen áriptestik pen yntymaqtastyq týraly kelisimdi is júzinde júzege asyrý yqpal etip otyr. Bıylǵy jeltoqsanda 10 jyldyǵyn atap ótetin bul qujat Qazaqstan-Eýropa qarym-qatynasyn jańa deńgeıge kóterdi.
Kelisimde kórsetilgen yntymaqtastyqtyń 29 baǵytynyń ishinde Astana men Brıýssel kólik jáne logıstıka, mańyzdy shıkizat resýrstary, jasyl energııa, tsıfrlyq transformatsııa, aýyl sharýashylyǵy, bilim jáne ǵylym salalaryndaǵy ortaq basymdyqtardy kózdeıtini basa aıtyldy.
A.Isetov ekijaqty yntymaqtastyqty nyǵaıtý Ortalyq Azııa elderi men Eýropalyq Odaq arasyndaǵy aımaqaralyq yntymaqtastyqty damytýǵa yqpal etetinin atap ótti. Osy turǵyda ústimizdegi jyldyń sáýir aıynda Samarqandta ótken «Ortalyq Azııa-Eýroodaq» sammıtinde qol jetkizilgen kelisimderdi tıimdi júzege asyrý mańyzdy.
Sondaı-aq qazaqstandyq dıplomat suhbattastaryn Prezıdent Qasym-Jomart Toqaevtyń «Qazaqstan jasandy ıntellekt dáýirinde: tsıfrlyq transformatsııa arqyly aǵymdaǵy syn-qaterler jáne olardy sheshý joldary» atty qyrkúıektegi Joldaýynda aıtylǵan elimizdegi reformalardyń negizgi baǵyttarymen tanystyrdy.
Sondaı-aq taraptar EO-nyń Ortalyq Azııa boıynsha arnaıy ókili E.Stıpraıstyń Astanaǵa aldaǵy saparyn qosa alǵanda, joǵary deńgeıli birlesken halyqaralyq is-sharalardyń kestesin qarastyrdy.
Qazaqstannyń Belgııadaǵy jáne Lıýksembýrgtegi Elshisi Roman Vasılenko Kazinform tilshisine bergen suhbatynda osy kezdesýdiń qorytyndysyna keńinen toqtaldy.
-Bundaı birinshi kezdesý Lıýksembýrgte Eýropalyq Odaq, Ońtústik Kavkaz jáne Ortalyq Azııa elderiniń syrtqy ister mınıstrleri deńgeıinde ótti, ol bizdiń úsh aımaq arasyndaǵy baılanys pen kólik baılanysyn talqylaýǵa arnalǵan. Bul óte nátıjeli jáne tıimdi boldy», - dedi ol.
R.Vasılenkonyń aıtýynsha, Qazaqstan qazirdiń ózinde ınfraqurylymdy damytýǵa 35 mıllıard dollar ınvestıtsııa quıyp úlgerdi jáne aldaǵy bes jylda taǵy 15 mıllıard dollar quımaqshy. Taraptar Ortalyq Azııa, Ońtústik Kavkaz jáne Eýropa elderiniń «Ortalyq dálizdiń» tolyq qýatynda jumys isteýin qamtamasyz etý úshin kúsh-jigeri arasyndaǵy sınergııany qamtamasyz etý qajettiligin talqylady.
-Armenııa men Ázerbaıjan arasyndaǵy qaqtyǵysty sheshýdegi progress Ońtústik Kavkazda Ázerbaıjan, Armenııa arqyly jáne Túrkııaǵa ótetin balama joldyń taǵy bir mańyzdy qubyrynyń paıda bolýyna múmkindik ashatyny týraly kóp pikirtalas boldy. Qazaqstannyń bul bastamany qoldaıtyny barshaǵa belgili jáne Ońtústikte tabıǵı damýǵa qolaıly jaǵdaı týǵyzatyn, Ońtústik Kavkazdaǵy beıbitshilikti qamtamasyz etýge tolyǵymen daıyn. Orta dálizdiń ótkizý qabileti qazirdiń ózinde jylyna 6 mıllıon tonna, biraq Qazaqstan, Ázerbaıjan, Grýzııa, Túrkııa jáne basqa elderdiń ınvestıtsııasyn eskere otyryp, bul kólem aldaǵy tórt jylda 10 mıllıon tonnaǵa deıin artyp, 2029-2030 jyldarǵa qaraı 10-11 mıllıon tonnaǵa jetedi dep senemi,- dedi Roman Vasılenko.
Elshi atap ótkendeı, kelissózder Qazaqstannyń syndarly kózqarasyn, sondaı-aq osy baǵyttaǵy barlyq seriktesterdiń úılestirilgen jáne belsendi túrde jumys isteýge múddeliligin kórsetti.
Osyǵan deıin EO sarapshysynyń Qazaqstannyń JI zańyn joǵary baǵalaǵany týraly jazdyq.